上個星期五(3月2日)恒指裂口低開之後就一直橫行，差啲仲以為已經收咗市定個Network有事；拆開恒指5分鐘圖睇嘅話，SlowSTC(14,3)係下晝1點50分時出現超買，恒指熊(57251)終於等到落場嘅機會，不過呢個位度落去又係開市個口價附近水平，兼且頭頂有條250分鐘線頂住，呢啲咁嘅阻力位又剛好好分鐘圖遇到超買，哼，都真係咪駛旨意破得到(I mean短期內)；同日下晝2點25分，恒指5分鐘圖SlowSTC(14,3)火速由超買變超賣，(57251)按買入同賣出價嚟計，其實都有六至七格落袋，問題係你個注嘅六至七格你夠唔夠食啫。
依家10點11分，恒指暫時最低做過30225點，開恒指牛熊證街貨圖睇，最貼價嗰兩Part牛熊證(30400至30499點同30300至30399點)呢兩堆牛證全數死亡；呢句都未打完，10點12分恒指再做出一個新嘅day low(都係暫時計)30178點，根本就係死亡直播咗30200至30299點嘅牛證。呢三堆牛證埋夾有相當於2649張期指，今日個市下半場可能同上個星期五一樣橫行就算，事關買跌嘅一早收晒工，買升嘅見到咁嘅情況仲唔仆去鵝頸橋打小人咩，你望吓月曆，今日驚蟄呀！
返番去睇恒指日線圖，上個星期講到依家嘅三線滙聚喺上星期四(1日)形成個點，當日支大陽燭破唔到，其後就出現兩支陰燭(計埋今日)，下方第一個支持位應該就係100天線(29999點)，呢個位又剛好係啲大關口(30000點)附近水平，若然呢個30000點天守嘅話，咁繼續下行嘅壓力就變得更大。再者，你睇埋條14RSI同SlowSTC(14,3) ，根本仲有位落。先預期30000點有支持先嘅，你肯博嘅就恒指熊(57385)，收回價31150點，同現價有約逾800點差距，28倍槓桿夠做day trade或小注過夜架啦(咁你肯博就係揀隻槓桿高啲架啦)；如果你今朝已經收割咗，諗住睇吓個市落到30000點時會反彈定二話不說咁穿落去，咁你下晝真係可以去鵝頸橋打小人，事關so far你都係等個市落之嘛，驚蟄一年一次嘅，唔打都睇吓呀！
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]
