上周五鮑爺喺Jackson Hole會議上大肆放鷹，市場終醒覺聯儲局未有耐可以減息，而加息路方向無變，9月議息加息0.75厘機會又再增加，美股承接上周五跌勢，隔晚三大指數繼續偏軟，港股今日期指結算，高開低走，半日恒指一度跌逾300點，二萬大關失守，恒科指半日更跌1.7%。
恒指高開39點，見20062正正係半日高位，高開低走失守二萬關，最多跌377點，低見19645半日低位，其後跌幅收窄。恒指中午跌179點，報19843；國指跌69點，報6800；恒科指半日跌73點，收4175。半日成交額548.66億元，繼續靜靜局，無晒局。
藍籌股普遍向下，港股日日靜蠅蠅，港交所(00388)跌穿320元支持位後偏軟，半日再跌0.4%。大笨象(00005)業績公布之後，股價落返50樓下都係咁款，吽吽逗逗，近日仍然受有關分拆亞洲業務爭議所困擾，睇怕短期股價都唔慌有運行。
至於比亞迪(01211)中期業績表現係勁，賺多兩倍，可惜股價跟埋個市高開低走，半日倒跌0.6%，幾好業績個市唔就都無用。
至於生科股今日繼續腳軟，整個板塊普遍向下，大部份股份跟隨大市下跌，跌幅由1.5%至超過半成不等。除咗三葉草(02197)獲候選疫苗加強針，尤其對BA.5具有強勁中和反應，半日股價逆市升8.2%。
債息回升，對呢一類高增長而未有盈利嘅公司最為不利，要生科股造返好，基本條件係美債息唔可以再上。
債息回升除咗對生科股不利之外，對科網股亦唔係好事，ATMJ幾隻龍頭都同個大市齊齊腳軟，美團(03690)業績好過預期，噚日上過190元水平之上，無奈又係大市唔就，加上190至200元阻力唔細，未能突破阻力就自然回返落去，半日倒跌1.8%。
至於京東(09618)又係業績交到課，可惜260元阻力過唔到，家下又回返落去接近240元水平，睇下呢個支持位守唔守，半日跌0.4%算係咁。
是日期指結算，結算未能企穩二萬水平，睇嚟港股暫時都係擺脫唔到上落市格局，重點係缺水問題一日未拆掂，缺乏成交配合下，都難有作為。再加上美股嗰邊擔心加息步伐加快，有機會震一震落去，咁屆時港股都係要陪跌。
麥狄文
(徐狄怡‧證監會持牌人)
