雖然美股續升，道指跟標指再創新高，但反映中概股表現嘅金龍中國指數跌逾4%，市場憂慮中美關係再趨緊張，中港股市今日唔多精神。恒指低開243點，報25795點已經係半日高位，大市低開低走，半日跌幅擴大至483點，見25555點半日低位，仲要失守埋條10天線(25758)。恒指中午報收25642點，跌396點；國指跌163點，報9095點；恒科指半日跌220點，報收6433點。半日成交仍然呆滯，只有679億，叫做跌市成交無顯著增加，不幸中嘅大幸。
美股投資氣氛形勢大好，但唔適用於中概股，隔晚喺美股上市嘅中概股跌到一仆一碌，騰訊(00700)ADR失守五百大關，今日返嚟都要跟跌，半日跌3.2%，啡底股身份再失。ATMX無一倖免，美團(00369)跟阿里(09988)分別跌4.1%及3.1%；至慘係小米(01810)，呢轉唔算彈得勁，半日又跌2.4%，22元再度失守。其他科網股齊齊回，連升多日獲北水湧入嘅快手(01024)今日亦吐3.4%，不過力保紅底股身份。
喺通脹威脅下，百物騰貴，唯獨豬肉價唔見有得升，萬洲(00288)首9個月盈利跌12%，反而股價逆市升1.3%。大笨象(00005)回購對股價帶嚟支持，半日逆市升近1%，阿Man都係嗰句，48至50元阻力大，現價再追入值博率有限。講到最差藍籌股要數海底撈(06862)，半日跌6.3%，繼續尋底，口痕友話海底撈不如易名「尋底撈」，同佢股價走勢更為貼切。其他餐飲股都死死吓，主要係內地近日疫情又轉差，新增59個確診個案，其中50宗為本土病例，而本地病例傳播風險更有擴散威脅。除咗餐飲股外，旅遊及出行股亦見沽壓，跌幅由超過1%至逾半成不等。
煤炭股沽壓未完，內地動力煤期貨連跌第六個交易日，今日煤炭股普遍跌1%至3%不等。相反電力股低開高走，阿Man愛股嘅龍源電力(00916)，見過18元樓下即見買盤湧入，可能同今日稍後公布業績有關。睇返同樣係風電股嘅金風科技(02208)第三季多賺逾46%，業績公布後，今日逆市升一成，唔排除龍源公布業績理想嘅話，明日股價可再下一城。其實喺全球減碳排大趨勢下，環保概念股一直受資金愛戴，喺未來一段時間，減碳排股份都會跑贏大市，值得逢回吐吸納。
麥狄文
(徐狄怡‧證監會持牌人)
