噚日(9月28日)隻恒指熊(68103)又係執番手續費，不過睇返恒指五分鐘圖，見指數喺下晝2點35分至45分，Slow STC(14,3)落到超賣水平，而指數嘅位置同走(68103)嘅時候相約，嗰一下覺得自己無走錯位；只係去到3點30至40分左右，Slow STC(14,3)再落到超賣位時，指數做咗下半場新低，(68103)自然又多幾格啦。不過算啦，(68103)唔賣都一早賣咗囉，唔係可以點呢。
今朝起身見到隔晚美股跌逾500點，而日經都有逾500點嘅跌幅；依家9點12分，恒指行緊U盤，睇咗恒指牛熊證街貨圖先。今日見牛證再有一層新增街貨，最貼價層上移至24200至24299點，呢度有相當於56張期指，而熊證方面，噚日恒指最高見過24564點，真係嚇到24600至24699點呢度熊證鼻哥窿都無肉，今日見呢層得返6張期指，走咗462張期指，算係熊證區裡最多流走嘅街貨層；同時，比較觸目嘅仍然都係25000至25099點嘅熊證街貨層，因為呢度有相當於1413張期指，怪不得噚日喺FB上都有讀者話佢大廈嘅看更叔叔都望住呢個位嚟打啦。
終於等到恒指行完U盤，開24276點，跌223點，(68103)過夜就爽(但說話唔可以咁講嘅，如果今日開市係升223點嘅話，就幸慶自己走咗貨架啦)，到正式開市之後，恒指二話不說地向下再插，插到第一粒燭最低24045點，搞到首兩層牛證街貨全數死亡，不過呢兩層夾埋都係得 相當於221張期指。同一位做按揭嘅老友Dick傾完個電話之後，再睇返恒指，跌幅已經收窄到得返200幾點，依家9點52分，恒指今朝做嘅24045點成為咗暫時嘅低位，都明嘅，指數一開市就搶到咁低，都要比返啲空間Slow STC(14,3)走動一下，所以都係等等指數回一回先再決定出唔出淡倉向下再追殺近牛街貨，留意住五分鐘圖上50分鐘線(五分鐘圖10線)做唔做到阻力先。
嚟到10點13分，喺五分鐘圖上見指數上破咗條50分鐘線，Slow STC(14,3)兩線勢頭繼續向上；再睇埋小時圖見到今朝嗰半個鐘行咗粒「十字星」出嚟，依家第二粒燭就出緊陽燭，但Slow STC(14,3)兩線仍呈下，私竇班戰友早就開好倉。
再穩陣啲嘅話，睇下指數上唔上破得到100分鐘線(五分鐘圖20線)先至出恒指牛(57919)，收回價23748點，同現價有約500點差距，約44.9倍槓桿夠DT用。
咁穩陣嘅原因係，以目前(10點22分)恒指報24368點計，接近企返喺牛熊證街貨圖嘅中間(24600+24099)/2=24349.5點；BTW今日期結，10次有9次指數都會向好。依家10點23分，指數繼續向100分鐘線出發，似乎可以準備落場啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
