噚日最後一注恒指熊(65043)即日收割，怕嘅都係小時圖上出「十字星」，果然喺最後嗰一個鐘恒指小時圖上見指數沿返條10小時線再向上運行。依家9點40分，喺小時圖上見作勢行出「圓底」格局，不過，喺五分鐘圖上見Slow STC(14,3)由噚日處於嚴重超買水平向下回落，指數由開市時微跌轉倒升逾百點，到依家再現跌勢。
反正五分鐘圖上見Slow STC(14,3)都返去差唔多接近超賣位，而指數又有條250分鐘線(五分鐘圖50線)支持住，望咗個街貨圖睇下發生咩事先。今日見到牛證嗰邊有四層新增街貨，最貼價上移返去24100至24199點，呢度有相當於345張期指，跟住嗰兩層都係吉嘅，再落到去23800至23899點先至有7張期指街貨咁大把，由23700至23799點開始打落四層就有三層都有過千張期指街貨喺度，怕且都係見噚日恒指尾市咁升得，所以搵隻牛證過一過夜，博今日再彈過。
嚟到9點50分，恒指穿埋250分鐘線，向下再移至500分鐘線(五分鐘圖100線)，同步Slow STC(14,3)兩線都向下落到去個位數嘅嚴重超買水平。換上保歷加通道的話，則見指數喺落到500分鐘線嘅同時，其實都向下穿埋保歷加通道底線。不過，受到Slow STC(14,3)兩線落到嚴重超買水平出現觸底反彈嘅影響，指數跌幅亦再見收窄，位置上又同保歷加通道底線有返啲距離。
再過多10分鐘，我家肥貓喺今朝開市時已經走咗過嚟喺我附近，依家同我只係大約一個梳化座位嘅距離，史無前例地咁近(入屋第56日，對貓咪果然係需要耐性，比對住個市嘅耐性應該要更多，因為你隨時可以唔理個市，佢仲有千千萬萬個老散會理佢；但貓咪就只有你一個)，搞到我好似被人監視住打稿咁；不過我老友長條形話佢應該係想學技術分析，但唔好意思開口。開個小時圖見到今日第一粒燭出現，不過又被條10小時線串住，而Slow STC(14,3)兩線處於大約60幾呢個中軸位置。
至於五分鐘圖方面，雖然目前10點6分計指數雖然重上保歷加通道中軸，同時Slow STC(14,3)都見喺低位抽升返上去，不過，基於保歷加通道口未見再度拓闊，同時見到DMI嘅ADX，無論指數上定落，佢都係向下走。
今個朝頭早都係放過佢先，唔落場都係一種策略。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
