話說領養我家肥貓到今日已經第45日(咁精準係因為我幫佢開咗個IG，記綠佢嘅所有事)，喺早兩日前義工小姐上嚟我屋企幫我同佢破冰，就係教我點樣摸佢；我有摸過貓咪(樓下街市雜貨鋪嗰隻)，但都無摸佢咁驚咁震，第一次我要捉住義工小姐隻手我先至鎮定啲，但係已經兩隻手濕晒，義工小姐叫我努力再試。去到噚晚，終於都可偶自己一個+貓草嘅協助下，成功摸到我家肥貓，雖然你又驚我又驚，不過試多幾次可能手感會好啲，又無咁驚嘅。
依家9點10分，趁未開市又睇下恒指牛熊證街貨圖先。今日見牛證有一層新增街貨，最貼價上移至25700至25799點，量唔多，得相當於20張期指。至於熊證最貼價層就係喺26200至26299點，呢度都係得41張期指街貨。中間位就係(26200+25799)/2=25999.5點，以上個星期五(9月10日)收市價26205點計，直頭踩咗入熊證第一層啦。
不過，去到9點20分做完U盤之後，恒指裂口下挫跌320點，開市報25885點，呢一下向下殺落令指數又近返牛證街貨層，日線圖上見指數再次靠近返保歷加通道中軸，Slow STC(14,3)勢頭向下，不過見整條保歷加通道開始接近走向橫行狀態，留意住保歷加通道中軸嘅支持力度有幾強。
嚟到9點39分，恒指正式開市後，頭段時間都仲keep住有逾300點跌幅，依家已經見到指數跌幅略為擴大，至跌453點，報25752點，睇嚟牛證第一層25700至25799點隨時都凍過水，向下再數25600至25699點為最多新增街貨層，有相當於391張期指；再狠心啲睇落多一層，即25500至25599點，則有相當於672張期指，為第二重貨區。八掛埋個小時圖見到指數今朝裂口向下重返保歷加下降通道，Slow STC(14,3)勢頭當然呈下啦，不過，100小時線(五分鐘圖100線)剛好接住依家恒指，而呢個位亦係上個星期四(9日)尾市都支持住恒指，仲喺上個星期五托返佢上去添；呢個位有無力可能要到10點打後，等小時圖再出多支燭先至可以確認得到啦。
再拆至五分鐘圖去睇，由於指數向下急插之下，Slow STC(14,3)兩線都已經處於超賣至嚴重超賣水平，出反彈係預咗，問題只係在於喺五分鐘圖上彈到去邊。雖然50分鐘線(五分鐘圖10線)已見明顯下行去搵返條指數出嚟，但呢個位都仲係有啲遠，又要等下先。
喺等緊恒指嘅時侯，有八掛過其他個股，但似乎都未有一隻令人心動，唯有搞住其他稿先啦。整好之後返嚟見到10點10分，小時圖上第二粒燭出現，果然係踩得住100小時線；至於五分鐘圖上見指數Keep住喺跌300幾至400幾點橫行，50分鐘線已經追到落到恒指附近位置。其實以恒指目前位置同牛熊證街貨圖對比的話，的確下行會有比較大嘅誘因，始終現價近下方牛證街貨而且數量都唔算失禮。
恒指熊(50618)，收回價26300點，同現價有逾550點差距，約35倍槓桿足夠DT使用，依家
10點15分，恒指五分鐘圖嘅50分鐘線已經同指數相遇，Slow STC(14,3)兩線當然出緊超賣再超賣啦，出熊嘅原因如上(近牛證街貨)，進取落場可以等五分鐘圖指數上破唔到50分鐘線偷位；安全嘅當然可以等Slow STC(14,3)上返超買再講啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
