成日都同戰友們講每個人嘅落場方法係唔同，所用嘅技術指標，甚至佢唔係圖表派都有其他方法去睇市，終於大家都只有一個，所以根本就唔需要將人哋嗰套完全copy and paste出嚟，用自己最舒服、最得心應手嘅去落場，盡做就已經可以。落場做Trade一樣，落場打羽毛球都係一樣。
噚日喺聊天室裡面都有同戰友們講定恒指日線圖似做出「十字胎」嘅物體，所以喺臨收市前15分鐘同定戰友講可以小注出隻Call嚟博今日反彈，最後噚日粒「十字星」失效，變咗陽燭「錘頭」，情況如同噚日喺【輪證下半Part】畫嘅百威(01876)差唔多，「十字胎」亦變成「身懷六甲」，Anyway，呢個都係觸低回升嘅訊號，所以先咁斗膽喺聊天室叫人開Call過夜(我真係好少過夜架)，結果今日恒指高開逾700點，開市報26221點，所以都同戰友講可以開市先走隻Call，鎖定利潤。都係嗰句：我都係睇圖架咋。
今日恒指彈得咁精彩，成堆科網股都做返好，美團(03690)、騰訊(00700)、京東(09618)同網易(09999)一洗頹氣，依家9點37分，恒指升幅已見大幅收窄，到依家升460點，報25934點，喺五分鐘圖上見Slow STC(14,3)兩線雖然未上到嚴重超買水平，但%K線已經橫行，並作勢穿%D線向下，指數高開低走明顯，唯有等恒指五分鐘圖上50分鐘線(五分鐘圖10線)炒返上去指數附近之後會唔會做到支持再踩住去啦。
換個小時圖出嚟，見到恒指暫時實心陽燭(高開低走的升)處於保歷加通道中軸之上，而騰訊同美團嘅小時圖都係出現相類似嘅走勢，指數重上保歷加上升通道固然係好事，再加上目前Slow STC(14,3)兩線勢頭仍然向上，可謂雙喜臨門。
日線圖再見到「身懷六甲」+「錘頭」嘅威力，再加埋Slow STC(14,3)觸底回升確認，是故今日恒指高開逾700幾點見報復式開市，不過，上行反彈嘅走勢仲可唔可以維持落去？以依家呢個圖嚟睇相信問題不大，貪心鬼隨時用10天線嚟做目標。
依家9點52分，仲有一分鐘就到何詩蓓出戰女子100米自由游賽事，幾分鐘過後見到何詩蓓以第一名嘅資格進入決賽，真心強！阿妹如果你喺奧運、仲要係游泳、仲要係自由式度連奪兩個牌嘅話，我諗所有不論喺唔喺香港嘅香港人都會為你歡呼、尖叫、喝采！
睇完何詩蓓之後，望望恒指，指數升幅繼續收窄中，不過見到五分鐘圖上50分鐘線同指數現水平差距愈嚟愈近，而小時圖上出咗今日第二粒燭，還好仍力守保歷加通道中軸以上水平，恒指牛(51344)，收回價25450點，同現價有約480點差距，54倍槓桿係進取之選；安全嘅都可以考慮恒指牛(65898)，收回價24748點，同現價有逾1100點差距，槓桿約有25倍。可以吼恒指五分鐘圖Slow STC(14,3)回返落去超賣水平進場，動作快同有時間睇市嘅，見到五分鐘圖上指數踩住50分鐘線上去追，採爬格仔策略亦得。
好啦！要睇羽毛球混雙啦，「鄧謝配」加油！件波衫排汗OK嗎？
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
