噚日喺【輪證贏家】揀咗隻恒指Put(24250)出嚟，雖然成日都等唔到恒指五分鐘圖Slow STC(14,3)上返去超買位置，但我相信應該有貪心鬼有理無理一早追咗。以噚日兇狠地用250天線做一跌目標，估唔到一日到位，仲多咗兩點(噚日恒指day low 27110點，而噚日250天線為27112點)，尾市都到目標價，全程輕鬆。
恒指八連跌完成，而大型「楔形」跌穿底線後嘅量度跌幅都幾近完成一半(但係從來都無人話過一穿形態，量度幅度就會跟足)，不過，如噚日所指，喺依家呢一刻就算發行商幾努力推新貼價熊上市，但都同現價仲有一段距離，以今日上市堆恒指熊中，收回價最近嘅係27981點，但都同現價(9點48分報27245點)有近800點差距，呢個幅度喺急插完之後，都幾難又一步到位上返去。
依家9點49分，恒指今朝微跌幾十點之後依家倒升90幾點，但喺五分鐘圖上見到指數上到250分鐘線(五分鐘圖50線)又再次下行，噚日臨收市前見指數插穿過250天線後兜底入Call過夜嘅聊天室戰友，見到呢個情況都醒水走人，啱呀！即使所有指標都話比你知個市跌到好殘，但事實係指數暫時仲未見有大幅反彈嘅理由/原因/藉口；所以都喺聊天室講定句如果喺五分鐘圖上見到指數遇250分鐘線阻力的話，可以小注出淡倉試試佢。
同PM同事message講返喺新場跟進中嘅稿件之後，再返轉頭睇返個市，咦？乜搞成咁呀？250分鐘阻力真係咁大咩？恒指再向下跌逾200幾點，老老竇竇，依家基本上所有分鐘至小時圖Slow STC(14,3)都出緊超賣再超賣中，日線圖兩線則處於嚴重超賣水平但都未見起色，都有同聊天室嘅戰友講，再出淡倉嘅話，都係用日線圖嚟度住先啦。不過，要都提提大家一件事，噚日恒指跌逾800幾點，一日急插，其實啲窩輪嘅引伸波幅已經chok高晒，所以大家揀窩輪做部署嘅時侯，望多兩眼、秤多兩下啲引伸，或者轉用遠少少收回價嘅牛熊證都可以，咁就可以避免受到引伸波幅嘅影響。
噚日相信有唔少人哭股喪，的確，有邊個正股嗰watch list可以全升？(有你唔好出聲，因住被人打)，或者怪就怪在ATM三隻真係變咗真‧ATM(提款機)，阿里(09988)200元血肉長城最後得返血同肉、騰訊(00700)向住500元方向出發、美團(03690)保歷加通道底線未收窄過，就算今日友邦(01299)力頂指數，奈何雙拳難敵四手，再加上市底弱，未必神仙難救，係連神仙都未出現嘅時侯，點救？
依家10點25分，恒指再次轉燈，睇返牛熊證街貨圖update，首三層牛證街貨已經全數死亡，呢度都有成3000張期指，連同噚日嗰8000幾張，睇嚟今個月大戶條數都已經到target，餘下落嚟嘅又等班好淡友慢慢爭持，喺呢段時間，作為老散嘅我哋得兩條路行「買同埋唔買，係咪？」痴線！我咁賤架咩：一係拉遠個圖，用日線以至週線去做一啲線少少嘅部署；一係就做快吞轟，縮短至五分鐘圖，甚至三分鐘圖做DT。咁樣做嘅原因係避免喺夾喺好淡中間，拉長個圖trade免事理；縮個圖短到你未嘈完我已經閃，都可以避開埋左一巴，右一巴嘅風險。
乃念依家10點35分恒指日線圖陰陽燭見出咗一粒「錘頭」，代表轉勢，只係下方Slow STC(14,3)仲未見低位確認回升，安全啲拉遠少少隻恒指牛(61041)，收回價26100點，同現價有逾850點差距，逾32倍槓桿係差距800至900點之間範圍內最高槓桿嘅一隻，都活躍架，等埋Slow STC(14,3)轉勢先啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
