坦白講呢幾日喺聊天室主要都係以出淡倉為主，最主要原因得一個，就係恒指現價同下方牛證街貨層仍然好近。如果問個市幾時先肯調頭，恐怕要等到熊證街貨追返落去恒指現價附近時先至會跌停、微彈、甚至大幅反彈。
噚晚收至大量push，都係講緊噚晚啲科技股喺美國跌得有幾金，今朝起身見日經都有接近300點跌幅，港股又怎能獨善其身？依家9點36分，恒指開市跌逾300點，再向下殺牛證，截至9點41分已見恒指首兩層牛證全數死亡，夾埋都有逾1300張期指，最貼價層依家落到去27700至27799點，但以截至同一時間為止，恒指最低做過27703點，換言之都可以當27700至27799點嘅牛證都死埋，呢度都有成747張期指街貨，再落嘅27600至27699點呢度就禾味啦，有相當於1569張期指。會唔會今日食埋？唔知道，不過肯定嘅係恒指現價同熊證最貼價層一日都仲係好似依家差得咁遠，一日恒指都會傾向向下去殺牛證，都話大戶取易捨難架啦。
依家9點51分，喺恒指五分鐘圖上見到指數低開後回少少再上，似乎係比返啲空間Slow STC(14,3)回一回氣之後再位位向下走，更麻煩嘅係，喺五分鐘圖上大約9點45分時見到走勢圖上出現「射擊之星」，都已經喺聊天室alert定班戰友，就算想開好倉博反彈都唔好咁鬼進取。
拉返個圖大少少，日線圖上已見恒指完全失守畫咗幾日嘅大型「楔形」底，只不過係Slow STC(14,3)兩線都回落到嚴重超賣水平，依家見%K線彷彿著地橫行，只係等條%D線到埋地之後，就得兩條路走：一係觸底反彈，一係出超賣再超賣。留意返保歷加通道係拓闊中，再加上上文提及嘅恒指現價仍然近牛證重貨，且熊證最貼證都仲未追到恒指，換言之出超賣再超賣令恒指再落嘅可能性好高。
如果用呢個大型「楔型」畫量度跌幅嘅話，其實都幾恐怖，因為一度就度到落去26000點，假設呢個量度跌幅係真嘅，中間都仲有一個抖氣位，就係250天牛熊分界線(27104點)；畫啫，無人話過量度跌幅就真係有呢個跌幅出現嘅，一條下降通道都唔會只係得陰燭啦，但如果恒指牛熊街貨嘅分布都仲係咁嘅死樣的話，恒指Put(27683)，行使價27,468，同現價有1.3%價外，低引伸、高槓桿之選，依家10點16分，見恒指低位都回升緊，又試下等唔等到Slow STC(14,3)上返去超買水平先時至出手。
至於噚日朝早手痕隻小米(01810)，喺下半part都已經講咗要搵位走，等到喺下晝2點35分時，見小米五分鐘圖Slow STC(14,3)上到80以上超買水平，喺呢個範圍行至3點到先至跌返落7字頭，不過都一早見%K線喺80以上呢個位穿%D線，逃生門已打開，按呢段時間小米牛(60004)高低位做過0.053元/0.052元，平均沽貨價為0.0525元，同噚日平均買入價0.055元比， 7月第一注輸4.5%，還好呢個數仲輸得起。
但係最激氣嘅係，噚日下半part捉嗰隻中生製藥(01177)，就係貪佢大支嘢同埋Slow STC(14,3)準備轉勢，不過乃念個人有啲黑氣，所以都只係bookmark住先，鬼知佢今日玩逆市造好，中生牛(55876)，收回價6.5元，同現價有約9.6%差距，今年12月底先到期，用日線圖嘅話，依家見Slow STC(14,3)低位確認回升，只係五分鐘圖已經飆咗上去，都係等佢一陣冷靜返先至再出手啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
