好彩，噚日隻恒指牛(63122)堅持多一陣，本身仲諗住林鄭噚日下晝3點出嚟見記者，個市會例跌，正當大家都係咁諗嘅時侯，恒指五分鐘圖上見3點打後指數真係由保歷加通道頂谷落並向保歷加通道中軸出發，不過又見保歷加通道頂都有啲力，最後喺收市前15分鐘以「大陽燭」姿態向上爆，完場前都咬緊返高位，只係收市嗰下係低於28500點少少。
睇返隻(63122)，噚日喺大約朝早11點25分至11點30分見恒指五分鐘圖上Slow STC(14,3)落到超賣水平但見回升，於是落場，按當時高低位做過$0.045/$0.044計，平均買入價為$0.0445。去到下晝2點30分至2點50分，Slow STC(14,3)終於由此前嘅超賣水平，出完超賣再超賣走返上超買位，仲上到90以上添，為免林鄭喺出嚟之後個市會見跌，於是就喺呢段時間放走隻(63122)，按當時高低位做過$0.046/$0.044，平均價為$0.045，打個和；算啦，捱咁耐你估易咩。
今朝喺張床時已經聽到出面好大雨，都幾肯定唔係個天唔鍾意我；起身睇新聞見噚晚美股同今朝日經都有500點以上嘅升幅，再睇埋今朝早個恒指牛熊證街貨圖，以噚日(6月21日)收市計，點數係比較近熊證街貨，心諗：恒指都可能跟喎。
行咗三個檔口先買到份《蘋果日報》，跟住先起行返工，到依家9點59分，早上有同聊天室戰友講以噚晚外圍同今朝亞股+街貨圖+恒指小時圖Slow STC(14,3)低位向上三個跡象，先暫定恒指大方向向上；但由於恒指五分鐘圖見Slow STC(14,3)喺嚴重超買水平高位作勢回落，所以先出貪心鬼淡倉一注，以爬格仔方式炒低向下先。結果，呢注爬格似乎唔止爬格咁簡單。
依家10點3分，小時圖反見指數有啲無稜兩可，都係繼續用返五分鐘圖做trade，依家見到恒指五分鐘圖上指數一度跌穿保歷加通道底部，Slow STC(14,3)落到20至30幾時已見低位回升，swing trade做法當然呢個位開好倉，博指數同Slow STC(14,3)同步再次向上。
恒指牛(62120)，收回價27960點，同現價有逾500點差距，槓桿比率約60倍，適合day trade使用；一旦指數唔過保歷加通道中軸的話，恒指熊(51799)，收回價28950點，同現價都係有逾500點差距，槓桿比率約33倍。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
