話說噚日忽然收到一盒包裹，一筒薄荷朱古力筒埋三盒Hello Kitty餅仔，多謝喺聊天室裡面認識嘅Vicky，為我首日轉場送上驚喜。
睇返恒指，噚日揀咗隻恒指熊(53444)出嚟，基本上打開恒指五分鐘圖就見到由11點20分開始，恒指已經受制於50分鐘線(五分鐘圖 X 10線)同100分鐘線(五分鐘圖 X 20線)，及至2點55分，由於250分鐘線向下走至迎接指數，同時見保歷加通道都只係微微拓闊，換言之即使指數破位但恒指跌幅仍未見太大收窄，及至尾市時段SlowSTC(14,3)重上80以上水平；不過，大走勢計SlowSTC(14,3)上行但指數上行力度並唔明顯，再睇埋小時圖，如噚日朝早所指，28250點附近已經見到輕微支持，喺【輪證下半Part】噚日出文後，以約11點20分至【下半Part】上文後1點40分計，(53444)高低位做過$0.111/$0.103，平均買入價為$0.107，尾市見到恒指跌幅收窄，話唔驚就呃你，不過，念在留意到恒指五分鐘圖250分鐘線(五分鐘圖 x 50線)係由上而下去接住恒指，所以恒指先出現「破位」嘅情況，(53444)過一過夜估計問題都不大。
依家9點45分，恒指今朝做完U盤後開升80點，本以為小時圖SlowSTC(14,3)勢頭已由低位向上翹會有轉機，但觀乎今日恒指牛熊證街貨圖牛證個量比熊證多之餘，即使熊證有新增街貨層，但同恒指現價都仲有一段距離，指數向下亦係無可厚非。
再望望隻(53444)，噚日收$0.098，依家見證價做緊$0.1，對比噚日平均買入價$0.107，暫時輸緊七格，仲揸唔揸落去就真係睇小時圖條10小時線(1小時 X 10線)可唔可以做到指數嘅阻力啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
