養精蓄銳嘅第二日，個人開始有少少思覺失調，以往喺舊場會同Designer Ken間中講下股票，家下唯有同舊場隔離team嘅team head送比我嘅音樂小狗做伴；佢聽得明嘅話我諗我真係會親自授教。
噚日揀咗隻恒指Call(13136)同騰訊(00700)Call(19263)出嚟，兩隻Call同樣地可以喺噚日朝早11點40分至11點55分落場，但可惜噚日下半場不論恒指定騰訊都舉唔起。
先睇隻恒指，噚日下晝開市之後見指數慢慢回升，先上破50分鐘線(五分鐘圖 x 10線)，其後於1點35分至1點40分時，更挑戰100分鐘線(五分鐘圖 x 20線)，可惜挑戰失敗，喺1點40分不敵100分鐘線嘅同時，仲要以一支大大地嘅陰燭向下走，順便跌穿埋條50分鐘線(五分鐘圖 X 10線)，呢個時侯唯有進行止蝕行動，按當時(13136)高低位做過$0.143/$0.14，平均走佬價為$0.1415，對比噚日嘅平均買入價$0.143，輸1.1%。
跟住到騰訊，噚日喺FB仲見到Ewing KC Cheng話希望隻騰訊生性，帶返恒指上30000點，雖不知佢日線圖條100天線猶如鋼線般，今日仲跌返落去10同20天線($623.3/$621.5)以下水平，橫行區未破，幸好噚日佢比位走嘅時間都多，由12點正至下半場1點35分，喺五分鐘圖上都破唔到條100分鐘線，就知佢咩料啦。按呢段時間(19263)高低位做過$0.355/$0.35，平均走佬價為$0.3525，對比噚日平均買入價$0.3475，咦？反手有執1.4%喎。
再睇返依家個市。9點50分，恒指低開後一度跌過百點，第一層牛證28800至28899點全數火速死亡，呢層又唔係話有好多貨，因為呢層係新增街貨層，有相當於100張期指；再過多6分鐘，整個風向逆轉，但問題在於恒指五分鐘圖上保歷加通道口暫時未見拓闊，但SlowSTC(14,3)就被大市忽然急升搶到高咗，咁樣追個五分鐘圖都真係唔係辨法，氣都咳，變陣！
拉遠少少條走勢圖，試用恒指小時圖去追，依家見恒指小時圖踩住保歷加通道中軸，SlowSTC(14,3)由噚日11點喺嚴重超買水平回落到目前中軸位置稍為見停。等到依家10點7分，指數繼續向上，而小時圖上再出多支燭已經企返喺保歷加通道中軸以上水平，SlowSTC(14,3)兩線於中軸位幾近重疊，或者唯一要做嘅就係等恒指五分鐘圖SlowSTC(14,3)返落嚟先至入隻恒指牛(66677)，收回價28450點，同現價有逾400點差距，約65倍槓桿DT用。喺等入市呢段時間，又同音樂小狗玩住先。
The last but not the least，今日有戰友無入市場，改入試場，以依家呢個鐘數，大家都估你應該應考中，加油呀！考完試之後要履行同我嘅約定：陪我喺地獄觀塘食Lunch！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
