今日或者最令人嘩然嘅新聞(對財經組嚟講),莫過於美國將小米(01810)列入黑名單。由未開始U盤到完咗U盤,聊天室一班戰友一齊望小米個價。
而好耐之前已經用日線圖,甚至出埋周線圖叫定聊天室嘅戰友Put定隻小米,翻查返【輪證贏家】記綠,喺1月7日都有叫大家可以追小米Put,當日只係輕輕地咬佢一啖;但如果揸到依家嘅話,以今日小米開市報$29,大裂口勁跌11%計,連埋引伸你都真係肥過米芝蓮。
部署一隻咁大熱嘅股票淡倉的確唔容易,早早一班開定小米淡倉嘅戰友都只係用周線圖去支持自已繼績持貨。的確,由周線圖見小米上星期出咗粒似疑「射擊之星」後,今個星期(主要係今日)再出支大陰燭下行,連SlowSTC(14,3)都被佢搶返低;反過來說,周線圖上10周線($28.46)由上年6月中至今日直成為佢嘅彈床位,怕且再落嘅都只能下望10周線呢個水平做首站目標。
「仲可唔可以追小米淡倉呀?」「穿$30應該吸引到啲錢入貨架?係咪應該Call返佢上去呀?」咁擔心做咩啫?小米有界內證架嘛。小米界內證(48647),上限價$30,下限價$26,中間價$28,接近10周線嘅下望目標。
當然,堅持DT嘅,依家10點16分,小米開市後曾經升到$30.5後再次回落,但依家連5分鐘圖嘅SLowSTC(14,3)都彈返起,小米牛(53549),收回價$26,同現價有逾11%差距,7倍槓桿DT應該夠,只要你唔貪心,慢慢逐啖逐啖咬佢就可以啦。
唔知過多幾日又會唔會有班美資輪商出嚟話要將小米嘅產品提早終止呢?
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/IG/Patreon:輪證贏家
秒投聊天室:輪證教室