明明噚日紐交所先話不計劃將三隻中資電訊股除牌,今朝起身咬緊個包時又話都係考慮除牌,好彩噚日八掛完三隻中資電訊股之後,都只係得個睇字,將噚日下半場開出嘅騰訊牛(65394)即日收割,食7.2%賺幅先至係重要。
今朝恒指低開30幾點後,恒指一直都未見有較大波動走位,直至到依家10點9分,恒指一度跌過百點先至叫做出咗少少方向;不過沉睡多時嘅京東(09618)同阿里巴巴(09988)就起動咗,連美團(03690)都成功再闖$300關口,前者炒計劃分拆旗下京東物流於香港上市,後兩者就因為富瑞估京東去年第四季收入按年升27%,所以持股嘅美團同阿里借勢起動,連騰訊(00700)都彈高,再向$600敲門。
一隻京東焫著四隻股份,特別係噚日先即開即食嘅騰訊,早知噚日隻騰訊牛(65394)留到今日啦,我都被佢「焫焫焫焫焫焫著」(呢期係咁煲呢隻歌,哈哈),BTW鋪鋪咁中法,都係嗰句:工都唔駛返;但見騰訊日線圖條SlowSTC(14,3)由過年前話佢出「十字胎」到依家都回到上超買位,而京東日線又見裂口高位出「十字星」,阿里日線又有條10天線頂住,美團破晒所有天線,但條SlowSTC(14,3)又唔生性,喺接近90呢個位作勢回落,焫到咁著,就算捉Day trade爬格仔都有難度。
睇返恒指日線圖,日線見恒指依家SlowSTC(14,3)兩隻上到90以上嘅嚴重超買水平,截至依家10點42分止,陰陽燭暫呈接近射擊之星,咁嘅樣走嚟開淡倉的確係可以發出「不反對通知書」,但係見到牛熊證街貨圖上,即使今日有新一批更貼價嘅牛證上市,但將牛證最貼價層只係推高至27200至27299點,始終以現價(10點45分計)27589點計,都係靠近熊證街貨堆,真係又一場技術分析vs街貨圖嘅比賽,如果貿貿然開淡倉,風險都真係唔少;再加上呢兩日恒指升時,股份升幅都比較全面,即使重磅藍籌上到有心無力,但二三線股仔都有機會異動發力,再搶高嘅話隨時27800點,安全起見,都係觀察為上,只係個心就開定淡倉,畢竟恒指今日係連續第五日升穿保歷加通道頂,且由12月22日低位25998點回升至今日暫見高位27719點,累升1721點,唔好忘記中間有好多日假期,咁短時間搶到咁高,恒指也許真的要睡一睡呢。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/IG/Patreon:輪證贏家
秒投聊天室:輪證教室