噚日恒指真係精彩，上半場慢慢推上至26365之後，5分鐘圖見SlowSTC(14,3)上到嚴重超買位就再慢慢回落，正當以為大市會喺26300點附近浮沉之際，下半場就忽然大瀉，更以2點之差將26000點以上嘅牛證滅族。今日再開牛熊證街貨圖，即時見至25900至25999點變成牛證重貨區，呢度有成過千張期指喺度，怪不得聊天室一聚弟兄姊妹開市無耐就衝入恒指熊懷抱，但可惜都要捱價捱到依家10點2分先叫做見恒指肯回，唔緊要，有時苦盡先會「金」來；都唔係第一次遇到重貨唔殺，到底今年恒指做乜要「積福」？
再睇返隻講咗兩日嘅SPDR金ETF(02840)，噚日裂口低開之後單位價格一直橫行，日線圖上已經明顯見到前日嘅「射擊之星」確認到，而如果再追S金Put(11254)的話，只要小心嘅係呢隻係冷門嘢就得，所以唔好勉強追入。喺5分鐘圖見SPDR金ETF於大約11點10分至11點20分期間，SlowSTC(14,3)上到超買範圍，按呢段時間膽大心細地入(11254)，以當時輪價做緊$0.039計，持貨至今日見SPDR金ETF單位價格再度下行，不過就無噚日出裂口下跌咁誇張。日線圖見雖然SlowSTC(14,3)依家只係由bookmark佢嗰日嘅嚴重超買回落到超賣至中軸水平，同步見100天線($1388)遇阻，現時回落至10天線($1351)作勢有支持，技術上似乎仍然有空間繼續向下走，反正(11254)目前輪價$0.041，就由得佢繼續先啦，只係小心技術走勢有無異樣。
另外，前日提到嘅港交所(00388)咁啱噚日撞正港股失26000點，佢都失守$400。今日見$400呢個價做得返，5分鐘圖見SlowSTC(14,3)喺依家10點31分上到嚴重超買位喎，不過見到一堆港交熊成交太零星，年尾流流仲要聽日得半日市，都係paper trade止痕算啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon：輪證贏家
秒投聊天室：輪證教室
