今朝早有個極度唔想開但點都要開嘅會喺稍後開始，所以今日廢話慳返(可能大家一早都想話：【輪證贏家】咪咁多廢話)。
依家9點46分，恒指高開升144點後掉頭向下，依家倒跌48點，做緊26437點，呢個走勢同噚日開市時有99.99%相似，唯一嗰0.01%唔同嘅話今日速度似乎快咗好多，開市到依家只係第三支燭就已經踩到落保歷加通道底部，怪不得聊天室戰友們一開始就話準備出恒指牛。
先睇牛熊街貨圖，今日牛熊兩邊都無新增街貨層，牛熊兩邊最貼價仍然分別為26300至26399點，以及26600至26699點，重貨區則為26700至26799點，即熊證第二層，呢度有相當於1304張期指；猶記得幾個月前嘅25000至25099點重貨區熊證街貨嗎？神功護體到唔知做咩死也不上，當然最終都係穿過，但令一班貼價牛不死捱得幾慘。
再睇返恒指日線圖，今日高開低走陰燭但下方仍然有10天線(26363點)支持住；噚日都講過一日未穿一日都唔知佢想點，只係估住大市每日暫用高開低走方法做DT。
睇返呢幾日揀中嘅個股，先睇中移(00941)。發瘟！日線圖上中移SlowSTC(14,3)兩線已經貼晒地，超賣再超賣死也不彈，懶死喺超賣位，仲要兩線數值低於5都唔起身，仲慘過小丸子阿媽叫小丸子起身返學咁。同步見10天線喺噚日已經跌穿20天線，發出短期「死亡交叉」之餘，仲要五條平均線向下...算啦，小丸子，你繼續瞓啦，初小已經停咗學架啦。
至於噚日先加入watch list嘅滙控(00005)，暫時(10點1分)見股價仍然上行，喺日線圖上今日個股稍為彈高於10天線($38.89)少少，而SlowSTC(14,3)就同中移嗰條完全相反，貼實咗喺天花板度唔回落嚟，話之你跳舞跳到上天花板咁high，咁嘅樣我唔high你就得啦。
最後都係噚日加入watch list嘅港交所(00388)，今日低開高走咁向上續行，雖然日線圖上行幅度唔算高，但總算方向同SlowSTC(14,3)係一致，而且噚日見只係剛好升返上各平均線之上，今日似乎再向保歷加通道頂出發，暫時最有睇頭係你啦。
港交牛(54782)，收回價$360，同現價有逾5%差距，換股比較50所以證價會細啲，以$0.001為一格，唔係$0.005，同一收回價中槓桿偏高同低街貨，一如以往吼5分鐘圖見超賣時小注買入。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
