依家9點15分,正常就應該喺巴士上,往公司方向出發,不過上個星期爆新冠肺炎咁嚴重,噚日仲話一日有過百宗,創單日新高。本身公司都已經分咗AB team咁返工,噚晚已經轉為極度不建議同事返工,於是又再次Home office,希望只係今個星期啦,我諗都無人希望呢個病會一直纏繞落去掛。
9點21分,恒指報出開市價25019點,跌69點,日線圖上繼續處於20天線/保歷加通道中軸(25241點)以下水平。
至於牛熊證街貨圖方面,熊證今日再有新新增街貨層,最貼價層下移至25300至25399點,呢度有相當於131張期指。重貨區就要上到去26800至26899點,實在太遠啦,拉返近少少見25700至25799點,即第五貼價層有相當於548張期指,呢個位算叫做相對地多街貨又近。
而牛證就喺24900至24999點呢度見到有相當於309張期指。按恒指開市呢口價計,向下走幾乎係不二之選咁滯。重貨區喺24500至24599點,屬第五貼價牛證層,呢度有相當於869張期指。近少少嘅話,其實喺24700至24799點呢度都有成647張期指,係最多新增街貨層,同開市價只係爭300零點,分分鐘一步到位。
上個星期有講過要望實條10周線(24537點),萬一24700至24799點呢一層無咗嘅話,再殺落去重貨區24500至24599點,咁就真係連條10周線都保唔住啦。
依家9點31分,恒指正式開市,恒指將跌幅火速收窄,仲倒升63點,做緊25152點。拆3分鐘圖見恒指SlowSTC(14,3)彈咗上去(開市都未夠5分鐘,又點睇得到5分鐘圖呢);蓋目前20天線/保歷加通道中軸仍為恒指阻力,日線圖同周線圖技術指標仍偏淡,恒指熊(55687),收回價25500點,同現價有逾400點差距,換股比率雖然12000,但槓桿逾44倍,Day trade嚟講應該有唔錯嘅爆發力,吼恒指5分鐘圖見超買時方進場。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB:輪證贏家