噚日被個市悶咗一日,今日恒指就即刻高開400幾點開市,到依家9點46分,升幅擴大至升逾500點,重返24500點以上,有耐性守得到噚日個悶市嘅話,咁前日隻恒指牛(60248)已經可以報到仇,可惜我無,只怪自已無相信同技不如人。
先睇咗牛熊證街貨圖先,今日恒指裂口再上,街貨圖上已見首四層熊證街貨被收回,最貼價層為24500至24599點,依家9點55分,望多次恒指,原來已經彈咗上去24600點樓上,換言之24500至24599點都已經死埋,呢度夾埋有相當於281張期指。
依家應以24600至24699點為首層熊證街貨,而呢度有相當於320張期指,係開始進入熊證稍為多街貨嘅範圍,最低限度都有啲300至400張期指街貨睇下;而重貨區就係喺25000至25099點,有相當於1136張期指。
依家10點1分,出咗內地GDP數據:第一季經濟收縮6.8%,為1992年有紀錄以來首現負增長。不過呢粒數似乎大家一早已經預咗,A股暫時未見有反應,所以暫時可以唔駛擔心恒指會受佢影響。
日線圖上見恒指今日再次彈高。有呈一浪高於一浪走勢,10天線噚日托得住,反映短期支持力度不俗,「楔形」形態未被破壞,保歷加通道口雖然未見拓闊,但整條通道已呈上行,頂部位置(25017點)又剛好等於熊證重貨區門口。
至於SlowSTC(14,3)當然仍處於超買水平啦,不過今日見%K線作勢再度升穿%D線,若 繼績上行,就轉用博佢繼續向上殺14RSI,但呢個就中線少少,絕非即日鮮睇法;再加恒指現水平咁近熊證街貨,而且熊證街貨貨量又有返咁上下,開Call睇耐少少,恒指Call(25134),行使價25200點,與現價不足2%嘅輕微價外,高槓桿、低引伸,仍以5分鐘圖搵落場位。
順帶一提,噚日[下半part]講隻騰訊(00700),因為燭身唔夠高嘅關係,估計出「黃昏之星」嘅機會扣減一半,於是反方向估有機會見「超買再超買」,如是,就上望保歷加通道頂(噚日mark底嘅價係$410.54),結果今日一步到位仲有找。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家