噚日一來個市悶到都唔記得咗佢存在，二來掛住準備過年用嘅稿所以完全唔記得咗寫[下半part]，anyway，以噚日下半場個市悶到咁嚟計，就算我記得寫都唔知寫乜好。
噚日喺【輪證贏家】都有提及過，恒指波幅指數(VHSI)落到低位，估計將會有一個大波幅市況出現；見今朝早恒指開市升逾300點，重上26000點水平；到依家9點49分，恒指升幅進一步擴大至升442點，做緊26317點，以為就係呢個大波幅，誰不知一開條波幅指數，乜仲低過噚日嘅水平嘅？莫非好戲在後頭？
Anyway，以頭先mark出嚟嘅現價加埋恒指牛熊證街貨圖睇吓先，26000至26099點、26100至26199點，同埋26200至26299點嘅熊證街貨全數死亡，而呢三part夾埋有1873張期指；而26300至26399點呢度就變成第一梯隊嘅街貨，如果將呢part拆開一半，26300至26349點呢度就有369張期指，至於26350至26399點呢度就有166張期指，以最高暫時做過26327點計，即係話26300至26349點嗰369張期指可以計埋入「死亡名單」裡面。
望望恒指日線圖，今日一個裂口向上彈起，成功升穿50天線(25949點)，而依家頭頂就有條100天線(26426點)喺度，而呢個位置都可以話同保歷加通道頂(26482點)差唔多，兩者都只係相差56點。「但現價(以10點2分mark底嘅26334四點計)同50天線或者保歷加通道頂計，相差最多都唔過150點，好話唔好聽真係轉個彎就到咋喎，遇頂咪又回？」保歷加通道的確最多比粒燭升/跌穿多兩三日之後就要走返入去條保歷加通道裡面，之不過都要睇返條保歷加通道肯唔肯比位個市去行，即係「你要，都要佢肯比先得。」睇返恒指日線圖，保歷加通道口係拓闊緊，即係話保歷加通道係比位個市行。
換言之，今日個頂係26482點，聽日個頂就好有可能係高過26482點，若後市keep住係咁拓闊嘅話，即係大市將會沿住個保歷加通道頂嗰條線而上行；同時望高少少，26600至26699點呢度有973張期指進駐，你估吓今日咁彈升法，會唔會有勇敢嘅資金忍唔住吼高造淡？如是者近熊嘅街貨又重咗，再對比埋下方老煉咁遠嘅牛證，再殺上去都唔係話無可能。恒指牛(60661)，收回價25758點，同現價有逾500點差距，槓桿比率41.7倍屬偏高水平，小注吼恒指5分鐘圖見超賣入市。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
