今朝一早開Facebook，全部都係已為人父母嘅老友送佢哋啲仔囡返學嘅「開學篇」校服照，喺屋企門口以至上學巴，至學校門口，甚至入埋學校喺走廊排隊等上班房嘅都有，小至幼稚園，大至小五都齊晒；不過最正都係我老友Marilyn今日生日撞正送個仔上小二開學禮，呢啲係咪就叫做「雙喜臨門」呢？Anyway，生日快樂！個仔咁就小二啦，望見家鄉架啦！
「仲有中二同大二呢？Long way to go！」我老友Marilyn今朝咁覆我。我無小朋友，但我做過小朋友，我諗大二同小二既距離，差不多等於恒指今年1月29日高位33484點同依家(9點50分)個現價27731點咁上下掛？近啲嚟講即係中二同小二或者就係今年6月19日個下跌裂口(30259至30012點)，點解會係呢個裂口？或者小學生比人嘅感覺都仲係小朋友一個；但一上到中學就唔同啦，年齡由之前嘅單位數變雙位數，又有一堆小一至小六嘅小朋友「墊底」，生理同心理上都有好多唔同嘅變化，所以用裂口嚟形容，似乎係最適合。
依家9點56分，恒指做緊27733點，跌156點，比今朝跌多咗，更加比上個星期五(8月31日)跌多咗；雖則上個星期五一早就將所有看淡嘅嘢全數掉晒，跟住就等收工，而今日恒指繼續向下，但依家見陰陽燭圖上恒指呈「T星」，即係話其實好淡兩方角力中，「喺一個唔係高位出現嘅『T星』有意思咩？ 」其實每粒燭都反映緊個市況點走，每粒都有用，爭在你留唔留意啫。 BTW，今日恒指成個燭身處於20天線(27926點)以下，即係話個市又落返去保歷加下降通道，而之前先到嘅技術指標都繼續keep住呈高位回落跡象，似乎恒指下行之勢繼續；如果係咁嘅話，恒指呢位小二生唔止「冧班」，可能好似足球隊或者賽馬，會「降班」落小一，同上面啲高位(即中二、大二)嘅距離愈嚟愈遠。
恒指「降」唔「降班」睇吓牛熊證街貨圖啦，一開就見到熊證有四part100點嘅街貨係零，不過呢四part第一梯隊講緊係第三貼價嘅熊證區，而最貼價嘅熊證就係27900至27999點，只要現價(10點19分恒指做緊27690點計)反彈升309點嘅話，就可以食晒呢度嗰196張期指，係咪好多呢？再上？再上多100點，即28000至28099點就有318張期指囉，跟住無架啦，就係嗰四part零街貨啦。
至於下方，最貼價嘅係27700至27799點，不過剛啱無晒，呢286張期指被個市喺今朝10點10分穿27700點之後就完咗，即係話27600至27699點呢度就變成依家最貼嘅價嘅牛證街貨，而呢度就有相當於250張期指。下方貨量同上方嘅差唔多，講緊都係得二百零張，但下方牛證就可以持續地食，事關層層都有啲貨喺度，恒指熊(59842)，收回價28238點，同現價有逾500點差距，年底到期且成交活躍，小注無妨。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
