話說今日lunch將會同我親愛嘅data provider Zoe食,佢順便介紹個新美女Sales比我認識,作為佢老友嘅我又確實係無可能「兩梳蕉」去見人架嘛,於是一返到嚟公司就打比Miss marketing幫我開佢哋個倉摷禮物。
摷完一大餐之後,執好兩份嘢再開返中國平安(02318)同中國移動(00941)睇,點解睇呢兩隻?事關噚日係<下半part>時見個市悶悶地,就捉啲個股出嚟,唔食都睇吓嘛,結果就被我搵到呢兩隻超買到準備鐘擺掉頭嘅個股出嚟,放定入去個「待put list」度。
先開中移,嘩!一個大裂口由噚日收市嘅$75跌到落依家(9點56分)見到嘅$72.95,日線圖上SlowSTC(14,3)%K線(76.534)明顯高位跌穿%D線(78.457);14RSI由噚日嘅68回落到依家嘅54.444,呢個幅度確係大,亦無諗到今日明明見到外圍造好,恒指開市時都仲升117點,到依家先到由升轉跌,但中移一開市就撻生魚咁撻咗落去。拆開5分鐘圖睇,中移今日大裂口向下之後,SlowSTC(14,3)同步由高位搶返落去,至依家(10點5分)落到兩線都處於個位數水平,若然博中移繼續下行嘅話,呢個絕對唔係一個靚位,建議都係比啲時間佢回一回氣先。
至於平保個走勢同中移完全相反,今朝隨大市裂口向上,暫時高位見過77.1元,日線圖上平保(10點7分)暫呈「十字星」,而SlowSTC(14,3)兩線都上到「9」字頭,「十字星」有待變嘅味道,同時見SlowSTC(14,3)兩線嚴重超買時,相信呢隻可Put性比中移更高;再加上14RSI近呢半年來再次見70以上水平,平安熊(64167),收回價80.8元,同現價有逾5%距離。不過,都係嗰句,個股輪證,仲要係買淡嘅方向係比較冷門,所以都係小注為上。
(點解冷門?我估大概係大多數人都鍾意見到個市升多過跌掛)
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan#