隔晚聯儲局主席鮑爺出席眾議院聽證會，今次講話都係同上次咁上下，唔算鷹亦無放鴿，大致都係指息率見咗頂，但通脹目標仍未達2%嘅聯儲局目標，亦唔急住減息。美股扭轉周二跌勢，不過收市升幅較盤中大大收窄，道指升75點，標指跟納指分別升26點及91點。反映中概股表現嘅金龍指數反彈1.96%，當中京東(09618)昨日績後股價於美股時段急升16%。港股隔晚ADR重返16500水平，夜期表現平穩。
雖然內地今年頭兩個月出口數據好過預期，但未有為港股助攻，反而喺生科股再陷美國制裁危機，以及內地又打算限制打機，搞到兩大巨頭網易(09999)跟騰訊(00700)腳軟，若非有京東(09618)頂住，恒科指又豈止跌少於1%。恒指低開20點，一度倒升74點，見16512半日高位，可惜仍未能收復10日線(16534)，即市內地數據出爐，港股亦無法止住跌勢，一度跌逾百點，低見16326半日低位，再度考驗20天線(16343)，其後失而復得。半日恒指收報16361，跌77點；國指跌5點，報5667；恒科指跌29點，收3383。半日成交額505億元，沽壓唔算嚴重，但同樣買貨嘅亦未見積極。
重磅科網股個別發展，京東(09618)上季經調整純利升近一成，績後股價隔晚已於美股時段偷步，升16%，而京東喺噚日業績公布前，已搶先炒高近一成，加埋半日再升6%，其實剛好係隔晚喺美股嘅升幅。騰訊半日玩燈掣，忽上忽落，最終仍要跌1%，275元首個反彈阻力未能突破企穩；阿里(09988)跌1.2%，暫仍守70元水平之上。
小米(01810)半日亦跌1.2%，自從小米嘅新能源汽車計劃啟動後，撞正減價潮，雖然小米汽車未正式推出市場，但生不逢時，未出消息就炒定上去，消息公布反高潮回落，到依家只係重回原點。內地有意再規管未成年人打機，網易(09999)半日跌半成，不過網易股價早已重返手遊股喺做冬當日嘅位置，反而騰訊距離當日320元水平仍有距離。
金融股普遍造好，大笨象(00005)今日除淨，股東財息兼收，除淨後股價再升1.4%，好息之徒成功搶息。平保(02318)亦升逾1%，友邦(01299)力水麻麻，半日升0.25%，但好過港交所(00388)半日跌1.4%。內銀股半日普遍向上，升幅介乎0.3%至0.6%咁上下。
美國參議院一個委員會通過限制內地生科企業在美開展業務的法案，雖然法案仍要參眾兩院通過及總統簽署才可生效，但受該消息影響，藥明系再次插水，藥明生物(02269)半日跌兩成，藥明康德跌16%，雙雙成為半日表現最差藍籌股。其他生科股受消息拖累偏軟，整個板塊睇落唔多精神。
相反，金礦股愈升愈有，國際金價持續上升，再創紀錄新高，連帶其他礦業股亦落鑊。紫金礦業(02899)升4.4%，山東黃金(01787)升3%；，黃金(03330)升1%，招金礦業(01818)升3.5%，五礦資源(01208)抽高14.7%，中國有色礦業(01258)升7.9%，中國鋁業(02600)漲4.6%，新疆新鑫礦業(03833)升5.1%。
港股跌穿所有移動平均線後，昨日收復部份失地，可惜10天線成短線阻力，暫時於幾條平均線之間穿梭，未能擺脫上落形態。內地人行一再強調仍有降準空間，對市場有正面支持，可惜內房市場未見有新招推出，目前大市只能好淡爭持。要重返所有平均線再向上升穿100天線(16700點)，港股才有較大突破。
麥狄文
(徐狄怡‧證監會持牌人)
