雖然以巴衝突升級至戰爭狀態，刺激油價急升，但同時帶動石油股及國防股上升，道指低開後回升，收市升197點；標指跟納指分別升27點及52點，三大指數連彈兩日，VIX回落至17.7。另一方面，聯儲局多位官員放鴿，美匯指數回落至106水平，離岸人民幣反彈至7.28，港股隔晚重上17600，今早繼續造好，半日升逾200點，成功收復10天線(17474)及20天線(17713)。
恒指高開209點，半日最多升399點，見17916半日高位，但暫受制萬八大關，加上A股表現不滯，昨日黃金周假期後復市已見下跌，今日跌勢持續，令港股升幅收窄至179點，不過既然一開市就挾淡倉，又點會輕易放過淡友，暫時都係守住10天及20天線，保住半日超過200點升幅。恒指半日升226點，報17743；國指升80點，報6079；恒科指升62點，收3887。半日成交額441.21億元，北水回歸後成交額叫略為回升，但都講唔上成交暢旺。
今日升市主要由科網股領軍，美團(03690)半日升3.6%，藍籌股之中表現最好，網易(09999)緊貼其後，升3.3%；小米(01810)、阿里巴巴(09988)跟京東(09618)半日升逾2%，；百度(09888)半日升1.9%，攜程(09961)跟騰訊(00700)升不足1% 。單係呢一堆科網股，已佔去恒指半數升幅。
金融股亦出咗唔少力，招行(03968)升2.2%；建行(00939)跟工行(01398)半日升逾1%，平保(02318)半日升1.6%；不過港交所(00388)、大笨象(00005)跟友邦(01299)半日升不足1%，彈力有限。內房股普遍隨大市反彈，升幅通常少於2%，只有碧桂園(02007)表示無法如期償還境外債務，股價逆市跌3.5%；碧服(06098)半日亦跌2%。
以巴衝突令地緣政治局勢升溫，航運股走軟，加上東方海外(00316)第三季收入跌65%，半日跌5%，藍籌之中包尾；其母公司中遠海控(01919)首三季盈利急跌77.4%，亦跌3.6%；海豐(01308)則下跌2.6%；只有太平洋航運(02343)升3.1%。
雖然中國汽車出口創新高，但隔晚蔚小理喺美股卻全線跌4%至10%不等，電動車開始減價淘汰賽，Tesla及比亞迪(01211)藉着年產百萬輛車，利用規模效應達至盈利，但蔚小理欠缺產量，喺減價戰中就比較蝕底，跟大廠減價虧損變大，但唔跟減價滯銷死得仲快，尤其係蔚來(09866)及小鵬(09868)財力唔夠雄厚，若然無法喺市場融資，只有走上被人併購之路，泊到個大碼頭先有得繼續玩落去。呢個亦係今日只得比亞迪隨大市回升，但升幅只有0.3%，蔚小理則跌1.4%至3.7%不等。
港股成交仍然偏低，顯然未見有新資金入場，但正因為成交偏低，大戶要舞高弄低指數成本更低，要挾淡倉只要沽盤略為收歛即輕易挾高三幾百點，不過挾倉還挾倉，未有成交配合，大市要真正轉勢回升當然有難度。恒指暫時成功收復10天及20天線，短線再向上挑戰萬八水平屬合理，只係萬八能否企穩又係另一回事，企穩萬八，方有條件再向上挑戰18300至18400，亦即50天線之所在。
麥狄文
(徐狄怡‧證監會持牌人)
