美股調整咗一陣，氣氛未見有太大逆轉，資金仍然傾向risk on，加上有消息指中美就中概股審計問題接近達成協議，中概股隔晚爆升，港股噚日半日市急升近700點後，今日升勢持續，恒指一度升逾200點，成功收復20000大關，並企穩喺10日線(19783點)及20日線(19887點)之上。但經過噚日急升之後，半日恒指升幅收窄至只有130點，加上周末前夕，缸邊友都唔想輕舉妄動，而被日挾到幾乎斷氣嘅淡友，更加動彈不得。
恒指高開170點，半日最多升216點，見20185半日高位，但20200阻力前未見再突破，升幅一度收窄至86點，見20055半日低位，其後又見活力，升幅再度擴大至百點之外。半日恒指升140點，報收20108；國指半日升44點，報6893；恒科指半日升24點，半日報收4292點。噚日半日市成交急增，好大原因係冚淡倉，但空軍被逼平倉後，今日成交又轉趨平淡，半日583億元唔算多，呢啲咁嘅成交額，好難講到個市係轉勢，始終港股仲係藍籌股普遍做好，友邦(01299)半日升近1%，但始終未能重上80元水平，仲要日線圖出咗針頂，暫時畀條50日線頂死咗。
油價呢兩日反彈，加上中石油(00857)半年多賺55%，半日升3%，留意OPEC嘅產油消息，始終中石油對油價走勢都較為敏感。ATMJ以騰訊(00700)表現較弱，其實業績之後，騰訊叫守咗300元彈返上去，但今日又係剛剛去到條50日線330元水平又掉頭。其他藍籌股都係咁上下，暫時都企唔到半日嘅高位，始終周末前夕，就算指數住二萬點水平，資金都唔係太願意追貨。
中美就中概股嘅審計問題，接近達成協議，可以解除中概股喺美國被除牌危機，噚晚中概股喺美市已炒到啪啪聲，今日中概股喺呢邊都普遍回升。不過阿Man無追貨之餘，仲減咗啲倉位，美團(03690)跟京東(09618)都已升抵阻力位，之前撈咗嘅平貨，今日都係先食為敬。內房跟物管股今日隨大市做好，同樣係畀機會大家減一減磅，再待回吐吸納，持有內房或物管股，十居其九都係坐緊艇，要積極少少食住個波幅游下水，雖然內房同物管好似已過咗最壞時間，但喺債務問題未完全明朗化下，走勢都係反覆，區間上落之際，唯有捉住個波幅游下水，盡量減低持貨成本。
麥狄文
(徐狄怡‧證監會持牌人)
