美滙指數回升，唔單止美股要連跌三日，就連人民幣都因為美滙強勢而轉弱，而美股期貨喺亞洲時段跌勢未止，令港股半日再跌至三個月低位。由於颱風逼近，市場預計明日有機會上半場甚至全日休市，有貨沽定先，令半日成交額增至551.15億元，沽壓增加。
恒指今早高開38點，見19542已經係半日高位，開市即掉頭向下，最多跌313點。見19189半日低位，穿咗5月10日低位，其後跌幅略為收窄。恒指半日收報19243，跌260點；國指跌92點，報6556；恒科指跌2.5%或104點，收4036。本來近日走勢唔錯嘅A股，喺人民幣轉弱後亦頂唔住，深滬兩市半日分別跌2.2%及1.4%，創業板指數跌幅更達2.9%。
藍籌股普遍受壓，大笨象(00005)半日跌1.1%，目前受制50元水平，喺分拆亞洲業務爭議下，大笨象股價動彈不得。港股成交持續低迷，港交所(00388)點會有運行，股價拾級而下，半日再跌1.8%，已逼近320元初步支持位，失守此關或直指300水平。AMJX之中，只有剛派出一份好過市場預期業績嘅京東(09618)逆市上升，雖然仍保持0.5%升幅，但高開低走，230元阻力未能突破。騰訊(00700)、美團(03690)跟阿里(09988)分別跌1%、2.2%及2.3%。半日只有八隻藍籌逆市上升，交出理想業績嘅安踏(02020)，半日升4.2%，係表現最好藍籌股。
龍光(03380)停牌超過三個月後今早復牌，半日跌逾四成，居跌幅榜榜首。雖然內地已開始拯救內房嘅行動，但能否順利拆掉大大小小內房債務炸彈，仍屬未知數，內房跟物管股隨大市下跌，跌幅亦甚為顯著。建發國際(01908)與建發物業(02156)主席遭調查，股價雙雙急跌，建發國際大跌27.5%，建發物業急跌兩成半；其他內房及物管股閒閒地跌3%或以上。
內地限電或拖累電動車生產，而小鵬汽車(09868)中期經調整虧損大，股價半日跌12.7%，更創香港上市新低。其他汽車股跌逾2%，汽車股走勢明顯轉弱。內險股則因為平保(02318)業績好過預期逆市升1.8%，帶動板塊內股份逆市上升，但人保(01339)跟財險(02328)則隨大市下跌。
麥狄文
(徐狄怡‧證監會持牌人)
