隔晚美股早段急跌後回穩，港股今日同樣低開高走，早段恒指曾跌逾400點，其後喺內地「某某」謠言更正後，大市止跌回升，重上21000大關，暫受制於20天線(21169)。恒指低開161點，盤中一度低見20648，跌440點，其後科技股回穩，個別重磅科技股倒升，港股收復失地，恒指半日最多升106點，見21196半日高位，但20天線未見企穩。恒指中午收報21114，升24點；國指報7278，跌19點；恒科指則跌41點，報4430。北水仍放緊假，半日成交額673.09億元，唔算少，但要支撐大市更上一層樓，就似乎唔多夠。
藍籌股個別發展，今早較為特別係央視報道杭州有「馬某」涉分裂國家被帶走問話，令阿里巴巴(09988)股價一度跌近一成，再失紅底身份。其後《環球時報》前總編胡錫進稱「馬某」遭刑事強制措施不準確，央視隨後亦作更正，「馬某」並非如大眾所估嘅「馬某」，而係另有其人「馬某某」，僅一「某」之差，市場即成驚弓之鳥，可見市場信心之弱。
其他藍籌股則個別發展，中銀香港(02388) 首季減值準備前經營溢利升7.2%，股價半日升4.7%，為表現最佳藍籌。而重磅科技股，美團(03690)半日升1.8%，騰訊(00700)半日升0.7%，阿里跌幅則收窄至1.6%。小米(01810)繼續孭住個藥煲，其印度子公司被凍結57億元，股價半日跌近4%。京東(09618)上星期升得勁，今日亦先行一步掉頭，半日跌4.2%，藍籌之中跑個第尾。其他藍籌升跌不一，係升勢唔夠全面下，亦限制大市升幅。內房跟物管股受利好房地產政策所帶動，兩個板塊今日表現出色，板塊內股份升幅由超過2%至超過6%不等。
醫藥股今日表現份外弱，和黃醫藥(00013)再遭美國食品及藥物管理局(FDA)拒絕批准兩種喺中國測試實驗嘅癌症治療藥物上市，半日大跌18.5%；其他生化藥股逆市走弱，只有龍頭藥明生物(02269)半日升0.6%叫好少少，其他跌幅閒閒地超過2%。
大市經過上周五急升，今日雖然仍有餘刃，但動力不足，歸根究底都係大市缺乏資金流入，今日收市成交若未見如上周五有1500億至1600億元或以上，大市再升空間有限。指數龍頭股之一京東係今次反彈之中嘅領頭羊，但京東今日已先行一步，逆市向下，一旦連另一火車頭美團(03690)亦向下回軟，大市呢一輪反彈可能又行人止步了。
麥狄文
(徐狄怡‧證監會持牌人)
