噚日揀咗隻恒指熊(52475)出嚟，計劃等五分鐘圖上見到Slow STC(14,3)上返超買位時先至出場。以噚日另一地方出文時間為1點18分計，其實喺1點25分至1點35分，可能喺你啱啱好睇完隻稿之後再睇返恒指五分鐘圖就見到條Slow STC(14,3)兩線上返去超買範圍，喺呢個時侯出隻(52475)的話，以當時高低位做過0.146元/0.133元計，平均買入價為0.1395元。
今朝未開U同作戰室嘅戰友睇咗牛熊證街貨圖先，一如噚日所料，20000至20099點變咗重貨區，呢度有相當於1037張期指，至於熊證街貨方面 ，最貼價嘅22300至22399點變成最多新增同重貨區，但講緊都只係得400幾張期指。坦白講其實噚日尾市時段喺作戰室裡面，見五分鐘圖Slow STC(14,3)落到咁低都真係值得小注出好倉一博，當然風險就係指數靠近牛證街貨，有可能個市繼續唔理技術分析，再次屠牛，之但係噚日都見到日線圖上有咁多裂口(我隨時數漏多一兩個都唔奇)，怕且指數向下落呢個動作都真係有機會停一停，就係吼呢啲時間少少地一注出好倉，滿足一下捉轉角嗰種快感之餘，為連日嘅見紅補返份特別。
依家9點58分，恒指今日終於都見升勢，指數一度升逾200點，如果噚晚有出到少注好倉過夜嘅戰友，相信唔貪心呢啲位偷吃咗一轉，Feel咗跌市中偷位好倉嗰種爽YY嘅感覺。至於隻(52475)，目前證價做緊0.14元，同噚日嘅平均買入價差唔多，呢一注基本上係以日線圖做Trade，但喺日線圖上面根本都搵唔到線可以量度得到止蝕位，索性set一個百比份比自己可以入肉幾多，最Max係幾多就閃，例如以買入價輸5%至7%為例，以平均買入價計算，即輪價觸及0.1297元至0.1323元就要考慮止蝕走人；又或者以指數上破噚日高位21327點作為止蝕位亦得。
當然，由依家呢刻開始變陣爬格仔亦可。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
