上個星期五(2月4日)留隻恒指Call過年博開紅盤成功，食過番尋味之下再搵隻安碩A50中國(02823)出嚟，博今日A股開工大吉開紅盤之餘，見佢日線圖出咗「十字胎」，所以就揀咗隻A中Call(28772)出嚟，小注落場試試佢。以上個星期五出文時牌下晝1點34分至全日收市計，(28772)喺呢段時間高低位做過0.081元/0.079元，平均入貨價為0.08元，留兩日過weekend還好都無咩事發生，依家仲有3分鐘左右完恒指完U，即管再睇睇發生咩事啦。
恒指完U後見到A50單位價格呈下，但望望親愛嘅A股，今日初七人日復工見造好，開出令人感動嘅紅盤，點解隻A50會變成咁？再等到恒指正式開市之後，見A50單位價格即時跌轉升，哦，明嘅，向來港女都係慢幾拍嘅。之前講明隻(27882)只係用嚟博今日A股開出紅盤之用，無理佢係紅盤高收定低收，所以開市後可以見到隻A50造好又趁機拿拿聲掉走隻(27882)。以今朝早 (27882)開市首10分鐘高低位做過0.083元/0.076元計，平均沽貨價為0.0795元，平均計都算叫做封補下個手續費。唔好理，總之就係萬歲啦！
依家9點51分，恒指都被封為「港女」好一陣子，就更係麻麻煩煩架啦，今朝恒指微升36點後，甫開市即跌80幾點，之後又再倒升返，無耐又再跌過，喺作戰室度大家都被今朝條恒指玩死咁滯，於是索性換個10分鐘圖睇，見指數雖然靠近熊證街貨層，不過都有向下運行嘅情況，特別係小時圖，指數喺小時圖上雖然未出現「平頂」，不過，Slow STC(14,3)兩線於嚴重超買水平位置遇阻回落嘅走勢相當明顯。去到10點時見指數有微微跌幅擴大，就連恒指日線圖上嘅100天線都稍失，於是出隻淡倉，先博指數喺小時圖上可以回返落去10小時線(小時圖10線)或50小時線(小時圖50線)作為首個目標先。
恒指熊(53046)，收回價25100點，高於熊證重貨區25000至25099點，同一收回價中槓桿最高，有逾31倍，以小時圖Slow STC(14,3)遇阻為落場原因。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
