噚日落咗幾轉街，由於落到樓再行去地鐵站中途一定會經過一間有售賣倉鼠、龍貓同兔仔嘅寵物店，所以噚日行經時都有望下鋪頭入面，店鋪部份玻璃外牆已經有黑布遮住，我只能夠喺條罐望入去，見到啲龍貓仍然在生，但倉鼠籠嗰邊就完全遮晒睇唔到。今朝起身睇電話，Push notification已經有條新聞講1200隻倉鼠就咁被「人道」，然後開電視見到大台新聞都有報，不過就搭埋兩年前荷蘭撲殺唔知百萬定千萬隻水貂嗰單嘢，彷彿同電視機前嘅講「人哋殺咁多水貂你唔嘈，我殺你2000隻鼠你哋就We嘩鬼叫，(可尾跟粗口一句，this is optional)」咁。
我愛倉倉，倉倉可悲，但係今朝恒指升百幾點開市之後，正式開市後頭嗰20分鐘，指數上到24514點先至停，還好噚日止蝕隻恒指Put(24516)，不過仲有隻滙控(00005)嘅Put(22014)在手。本以為指數升到媽都唔認得時，隻(22014)會輸爆肺，點不知呢隻嘢逆市下行，依家10點15分，喺指數再上今日新高，報24566點時，隻獅子跌緊1.8%，開始set定啲目標位置，一個最同股價最近嘅梗係10天線，咁啱小時圖上嘅50小時線個位置同10天線都差唔多，喺作戰室都同大家講定，隻(22014)嘅第一個目標就係10天線位置。
睇返恒指，依家10點25分，恒指做緊24579，升445點，喺牛熊證街貨圖上見指數已經將首三層熊證街貨全部殺死，呢度有相當於343張期指，唔算多，不過重貨區24600至24699點有過千張期指，而呢一層只係喺熊證第二層街貨，指數/好友如果再狠死啲嘅話，下半場上到呢一層都唔出奇。
恒指彈得咁強，其實唔係無跡可尋。日線圖上見到指數之前受100天線限制而下行，不過下方又有50天線做成支持，當然，最短嗰條10天線會係跟得指數最貼，所以喺下方慢慢向上追返住條指數，追到今日已經見到10天線上破50天線，發出「黃金交叉」訊號，指數踩住10天線又好，50天線又好，兩線支持比力指數再上，成件事變得合情合理。而再望返今日日線圖100天線擺位24604點，其實喺圖表上見指數暫時(@10點31分)高位24588點，只係相差16點。破唔破到？問下啲大好友啦！
恒指牛(53937)，收回價24078點，同現價有逾500點差距，市場上首十隻貼價恒指牛嘅其中一隻，約56倍槓桿都真係好夠DT用。以恒指咁強嘅升勢就更係順勢而行，亦都比較難去等Slow STC(14,3)落返超賣水平而入(今朝作戰室都係硬搶好倉架咋)，或者睇睇五分鐘圖上嘅50分鐘線(五分鐘圖10線)有無支持推指數上去，見有的話，迫巴士咁迫上去啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
