隔晚美股無乜方向，市場等待美企公布季度業績，三大指數個別發展。至於港股今日表現唔錯，內地消費及固定資產投資數據較預期佳，港股上日跌175點後，半日反彈逾300點，恒指成功收復10日線(27837)及28000點。恒指高開13點，雖然早段曾倒跌46點，見27741點半日低位，但內地公布一系數據後，大市掉頭回升，成功收復10日，半日最多升393點，見28181點。半日恒指中午報28126，升339點；國指升139點，報10205；科指微升5點，報收7672。不過留意恒指28000至28200為之前重要支持位，跌穿呢個支持位後直落27000水平尋底，目前反彈28200由之前支持變為阻力，短期需要更大成交配合才能進一步突破。
藍籌股大致向好，友邦(01299)跟大笨象(00005)半日分別升1.9%及1.1%，阿Man一直睇好嘅體品股龍頭安踏體育(02020)半日升2.3%，盤中更創新高，睇嚟要變雙紅底股指日可待，有貨不妨再坐一會。為迎合監管機構需求，有消息指騰訊(00700)跟阿里(09988)或考慮向對方開放生態糸統，打破壟斷指控，希望阿爺可以放佢哋一馬，兩股半日分別升2.2%及3.1%。不過對於內地政策風險呢樣嘢，滴滴一役之後，真係嚇窒外資，連登契媽都開到口，監管風暴跟政策風險，令相關股份估值受壓，尤其平台股阿Man就更加唔放心，一日阿爺唔表態話監管整改完成，呢啲股份阿Man認為只會有波幅，冇升幅，短炒吼特價時段撈貨，咪見倒反彈回升走去追貨，好易中伏得不償失。
內銀跟內銀股表現唔錯，電子保險銷售商眾安在綫(06060)上半年保費收入增加四成本，半日股價反彈13.3%，不過眾安上面蟹貨多過陽澄湖大閘蟹，都係食花生做觀眾，參與炒作咪預我。平保(02318)半日升4%，其他內險股閒閒地升返3%。內銀股重磅如建行(00939)跟工行(01398)半日升逾2%，真係無乜幾可，不過內銀股真係引唔起阿Man嘅興趣，息率吸引只因股價低迷，坐貨收息唔係阿Man杯茶，炒股求資本增值先係硬道理。
物管股就快踏入業績公布期，有大行預計會有超過十隻物管股將發盈喜，今日物管股亦吸引資金流入。阿Man就吼住世茂服務(00873)，集團收入增長迅速，去年起大力拓展第三方項目，係唔大行嘅物管心水股。25至26元之間收集，博佢發表盈喜推動股價再創新高，目標就跟返大行目標參考，無30元都有28，跌穿24元打靶，都算夠值博率。
麥狄文
(徐狄怡‧證監會持牌人)
