熱門:

2020年8月5日 即巿股評 港股直擊

【盤房來料】國策雖傾斜 中芯現價略嫌貴

隔晚美股繼續做好,雖然港股隔晚喺夜期同ADR無乜反應,但今朝內地財新中國7月服務業PMI差過預期,令早段大市曾出現震盪。恒指高開82點,開市後一度升逾百點,其後倒跌78點,見24868點半日低位。不過A股消化財新PMI消息後倒升,港股回勇升破二萬五關。半日最多升204點,見25150點半日高位,一度重上20日線(25126點),可惜未企穩。恒指中午報收25088點,升141點;國指報收10255點,升51點。科技指數今早見7533點新高,半日報收7528點,升1%。

重磅股升勢當然唔全面,否則恒指可輕易重返20日線之上,騰訊(00700)半日升1.7%,重上550水平有望再創新高。噚日有大行報告將其目標價調高至645元,阿Man唔覺得意外,騰訊股價自6月升破450元展開中線升浪以嚟,大行相繼調高其目標價,尤其美國嘅科技龍頭股沒有最高只有更高,騰訊亦拾級而上,年內要升破600元冇乜難度。螞蟻集團好大機會成為全球最大IPO集資額案例,A+H股同步上市,集資額高達300億美元,預期第三季尾至第四季初展開招股工作,港交所(00388)呢鋪肥過肥仔水,股價半日創387.6元新高,差少少見388元,半日升2.4%。至於噚日叫住咪多手搞嘅本地地主佬,反彈之勢僅曇花一現,話咗呢個板塊避之則吉,阿Man梗係唔會老點大家。

金價首次升破2000美元大關,喺全球對黃金需求殷切下,金價創完歷史高位未見回調壓力,反而一舉升破2000美元,睇嚟調高咗嘅目標價2000至2200美元上限都無乜走雞。金礦股跟黃金ETF坐定定,不過南方黃金ETF(07299)有兩倍槓桿,自從呢隻兩倍槓桿嘅ETF登場後,SPDR黃金ETF(02840)畀佢搶走唔少客仔。

國務院發布集成電路產業稅收優惠政策,晶片股再度受追捧,本以為由40幾樓碌落去廿幾樓嘅中芯國際(00981)已散水,因為國策傾斜關係,竟然上得番去30元水平,不過阿Man真心覺得30元樓上嘅中芯係唔平,尤其股價高位回落至7月7日大陽燭底部之下,要重上35元樓上有難度。

醫藥醫療股個別發展,阿里健康(00241)上月大股東減持後,又到公司配售4.99億股,集資100億元,配股價折讓8%,股價中午跌2.8%,又再跌穿22元水平,短期唔慌有運行,反而微創醫療(00853)發盈警後,股價先低後高,市場相信集團已捱過受疫情影響嘅最差時間,股價喺35元之前搵到支持,低位拗腰倒升近5%。

數嚟數去要搵落後新經濟股,其實背景雄厚嘅眾安在線(06060)都算落後,雖然股價今年喺25元起步,最高見55元水平已翻咗一番,不過拉闊少少個畫面睇上市高位接近一舊水,即係現價計都少咗一半。公司上半年淨利潤增長唔少過100%,公司月底公布業績,咁嘅成績現價市盈率分分鐘縮到得番60幾倍,其實一啲都唔貴。現價買入博上番50元樓上再展升浪,呢次再升當然睇破前高位55元。

 

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads