第10日home office(日日咁數,我開始覺得自已好似活喺荒島嗰啲人咁,日日數日子等人救)。噚日11點到出門口,12點到返到公司,成層樓10個人都無,但重要嘅係老細走嚟比封開工利是我,仲有同team另一位同事都比咗封大嘅開工利是我,Well,我返去其實係想返下公司,希望見下班同事啫。
今朝起身天陰陰又落雨,襯晒依家武漢肺炎嘅情況同市況;但恒指偏偏就玩背馳,依家9點54分,恒指升幅已經擴大至升逾300點,做緊27548點,暫時最高見過27583點。
二話不說先睇牛熊街貨圖,原來熊證街貨新增咗一層,最貼價落到去27300至27399點,將牛熊街貨差距進一步收窄;但無用呀,頭兩層熊證街貨都已經死咗,依家踩入嘅27500至27599點雖然得5張期指街貨咁大把,但再向上爬嘅話,喺27600至27699點呢度就已經有成547張期指喺度,依家會唔會率先收隊我唔知,但似乎恒指今日已經有方向。
再睇埋恒指日線圖,嗯...依家9點58分(電視機忽然傳嚟林鄭把聲...It doesn't matter),恒指今日暫呈陽燭,但位置就處於50天線(27114點)以下,情況就好似山頂啲纜車,頭頂有條鋼纜。
依家10點9分,恒指升幅又再擴大咗少少,升354點,報27595點,最高暫見27604點,即係話27500至27599點嗰5張期指都無埋,依家恒指企嘅位置,正正係對住熊證多/重街貨區啦。
恒指牛(57312),收回價26988點,同現價有近600點差距, 市場上第二貼價牛證,桿槓亦都係第二高,有逾47倍,低街貨亦係另一賣點,問題只係依家(10點16分)5分鐘圖見SlowSTC(14,3)上到嚴重超買水平,要入牛博day trade的話就要等個市冷靜下先啦。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家