熱門:

2019年10月8日 即巿股評 港股直擊

【盤房來料】港股反覆 炒股唔炒市

雖然隔晚美股反覆偏軟,三大指數下跌,但港股今朝未見受影響,反而跟隨內地股市做好。美股腳軟係因為市場擔心喺周四重啟嘅貿易談判或出現變數,而香港呢邊過去三日長假期亂過亂世佳人,但港股都仲可以平行時空,完全唔受影響,仲可以跟住內地股市升,又一次證明香港人搵錢大過天。

恒指高開27點,其後倒跌59點報25761點半日低位,其後內地股市帶動下回升,最多升359點,見26180點半日高位,其後升勢回順,升幅收窄。中午恒指報收25992點,升171點;國指報收10246點,升99點。喺香港出現社會運動呢幾個月以嚟,每當特首出嚟講話,港股普遍下跌,更有缸邊友笑言,特首係呢段時間嘅人肉熊證,但今日比較特別嘅係特首出嚟講嘢,個市竟如未有一如過往下跌,將唔少淡友殺過措手不及。

重磅藍籌股普遍向好,有傳聞大笨象(00005)將進行大瘦身,擬削全球1 萬個職位,半日升0.9%,不過股價唔上番60元,兼且壓喺多條移動平均線之下,走勢仍難樂觀。而騰訊(00700)半日亦升近1%,暫時騰訊股價叫守得住320元,呢個位穿得嘅話,真係大件事。港交所(00388)向倫交所求愛被拒,本來諗住加碼窮追不捨,可惜唔單止倫交所管理層請港交所食檸檬,就連倫交所股東亦唔受動搖,港交所終於放棄。之前因為收購而股價跌到一仆一碌,家下肯死心,股價反而反彈超過2%。

阿Man經常強調,長線睇好醫藥股,係因為人口老化問題,以及內地生活水平提高,對醫藥需求有增無減,即使行業需要改革,短線陣痛係可以換嚟更好錢途。之前醫藥股受政策所累下跌,但唔使三扒兩撥又上番嚟,之前一直睇好嘅龍頭中生製藥(01177)同石藥(01093)半日分別升4.3%及5.3%,而呢期就睇好三生製藥(01530),半日升4.1%,表現亦唔錯。

除咗醫藥股之外,內需股及物管股一樣有唔錯走勢,呢兩個板塊一直唔受貿易戰影響,即使過兩日嘅貿易談判結果如何,呢幾個板塊都唔受影響,算係另類避險選擇。不過陀地地產股就大鑊少少,近日嘅社會運動不僅影響零售業務,而地產商旗下嘅商場首當其衝。仲有住宅銷售上周急跌,地產股呢期避之則吉。

不過指數走勢飄忽,港股暫時仍然喺26000附近爭持,下面25600支持位守得唔錯,但上面26200阻力仍大,跟指數糾纏冇乜着數,都係炒股唔炒市穩陣。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads