講嚟講去又係中美貿易關係有所緩和,只係約咗10月已安排好雙方會面談判,就好似講到協議已達成咁款,不過呢兩日唔見侵侵喺社交平台亂吹廿四,美股都總算平平靜靜。至於港股就高開後有啲腳軟,加上內地股市回吐,港股先高後低。
恒指高開150點,開市後曾升189點,見26870點,創逾一個高位,亦回補8月5日嘅下跌裂口,不過回補裂口之後又見回吐,更曾倒跌46點,見過半日低位26634點。恒指中午報收26703點,升22點;國指半日跌3點,報收10413點。
藍籌重磅股個別發展,都係咁上下冇乜特別,要數最勁係中資電訊股,聯通(00762)和中電信(00728)簽署《5G網絡共建共享框架合作協議書》,兩隻股份分別升5.5%及3.6%,分別為最大升幅藍籌及國指成分股,而中移動(00941)亦升0.5%。不過呢個協議令5G設備股腳軟,市場擔心5G資本開支下降,相關設備股跌1.6%至超過4%不等。
油價創6個星期高位,三桶由乘機發圍,半日齊齊升逾2%。阿Man就一直唔多睇好油價中長線走勢,尤其多國正擔心經濟下行壓力增加,經濟唔好油價自然難走強,短線做好亦只能帶動三桶油短線走強,始終大方向無變,石油股又特別鬼過人,打死都唔會高追。
話就話次次蘋果有新產品發布,手機設備股都乘機落鑊,但呢個板塊炒咗幾日,而今日有蘋果星級分析員指3款新iPhone下半年的出貨量將按年跌5%至10%,相關手設股全線向下。強如舜宇(02382)亦先升後回,中午倒跌3%。
北水基本上係港股呢期最大購買力,被納入為港股通新貴,亦最吸睛,之前阿Man喺其他平台早已推介嘅錦欣生殖(01951)半日更創上市新高。但之前已提到錦欣生殖估值唔算平,睇好其中長線發展,短線目標12元到達後,抖一抖回氣亦出唔算出奇。
估計下半場港股亦唔會有太大方向,缸邊友除咗等美國聯儲局議息外,仲要等埋美國國會開會表決,香港未來會否失去特殊地位,確要睇一班議員有乜反應同點投票。既然咁多不明朗因素,聰明缸邊友又豈敢貿然入場。
麥狄文
(徐狄怡‧證監會持牌人)