隔晚美股三大指數繼續下跌,主要係擔心中美貿易戰毫無進展之餘,貨幣戰爆發,令資金湧入債市及黃金等避險資產,令美國國債孳息率再跌,10年期美債息低見1.637厘,與2年期相差不足0.1厘,一旦出現倒掛,即10年期債息低於2年期,反映市場估計經濟衰退快將來臨。而3個月債息跟10年期債息已持續倒掛達-0.3厘水平,根據過往紀錄,未來幾季之內就會出現經濟衰退。經濟衰退嘅陰影籠罩市場,短線環球股市都係瓜多過菜。
至於港股隔晚喺夜期跟ADR已經跪低,今早恒指低開288點,早段跌幅曾收窄至208點,見過半日高位25616點。不過行政長官開記招,回應有關噚日機場受示威活動影響而癱瘓,可惜記者會上繼續遊花園,遊下遊下個市就跟住佢遊咗落去。中午前一度跌483點,低見25341點半日低位,亦係今年1月4日以嚟低位,相距1月3日暫時今年低位24896點,只有不足400點之差。恒指中午報收25345點,跌479點;國指跌144點,報9853點。另一點要留意係,今日上半場跌市成交有451億元,相對噚日增加,睇嚟沽壓開始愈來愈大。
藍籌股唔使問接近全軍覆沒,話咗幾強都好,一向策略都係先沽弱勢股,但強勢股唔代表可以逃過一跌,只係遲些少跌。之前一直強勢嘅中生製藥(01177),半日跌4%,藍籌之中跌最多。阿Man上周已提醒過,即使坐住強勢股,亦係時候要減磅或撤退,多持現金為上策,今日中生急跌,就係印證幾強嘅股都好,當缸邊友選擇要錢唔要貨,一樣要捱沽。
至於銀娛(00027)及金沙中國(01928)濠賭股跌逾3%,如果有睇倒上周五阿Man喺社交媒體嘅直播節目,已表示濠賭股唔單止係受近日香港連串示威活動影響,積弱亦唔係一朝一日咁短嘅事,反彈博唔過更加係有貨要走佬,睇嚟呢個板塊繼續無運行。
至於其他龍頭藍籌股亦全面下跌,就算友邦(01299)噚日幫手維穩,今日亦不敵大市跌勢插水2.8%。其他大笨象(00005)、平保(02318)、建行(00939)等等,全部難逃一跌。騰訊(00700)明日派成績表,雖然大部份大行都睇好其第二季度業績,阿Man只係擔心,一旦業績公布稍稍差過預期,呢期一直跑贏大市嘅騰訊要一鋪還番突,追跌之餘仲要拖埋個市落水。
家陣大市下一個重要支持為年初低位,即25000水平附近,不過250周線25525點失守,呢個位亦係50個月線25576點附近,所以之前亦有提過25500點水平係一個重要支持,呢個支持位失守,基本上大市要向下推進至24000點,亦即100個月線23973點之所在。
麥狄文
(徐狄怡‧證監會持牌人)