熱門:

2019年7月15日 即巿股評 港股直擊

【盤房來料】醫藥股幾時揀龍頭都冇錯

上周五美股三大指數創新高,但港股早段受百威亞太上市褪軚所影響,早段低開低走曾急跌400點,其後內地公布經濟數據好過市場預期,內地股市做好,港股亦跟住拗腰倒升。恒指早段低開168點,其後跌幅擴大至400點,低見28071點半日低位,跌至50日線(28056點)附近暫見支持。其後內地公布第二季GDP增加6.2%,合符預期,A股反彈帶動恒指拗腰回升,最多回升86點,見過半日高位28558點。恒指中午報收28532點,升61點;國指升39點,報10828點。

本來百威亞太上市計劃胎死腹中,預咗會影響大市氣氛,不過港股都係跟住A股風向走,A股上港股跟。不過港股雖然能夠喺裂口低開後,即日回補裂口再倒升,但28600阻力仍未能衝破,暫時大市喺28600至28800點阻力仍然唔細,一時三刻要突破唔容易,除非有重大利好消息,否則港股暫時都係浮浮沉沉,反覆上落居多。

重磅藍籌股方面,港交所(00388)損失咗百威亞太呢個大客仔嚟香港上市,股價下跌好正常,半日下跌1.3%,但仲企得喺270元樓上,已經算係咁。百威亞太話因為多個因素而縮沙唔上市,阿里巴巴話要回歸港股作第二上市嘅決定,未知會否受影響。若然阿里話回歸又放飛機,港交所下半年都好難再闖高峰。

內地6月消費品零售總額出乎預期理想,消費股見有資金流入追捧。少咗百威亞太呢個競爭對手上市,對華潤啤酒(00291)及青島啤酒(00168)反而係好事,少隻香爐少隻鬼,投資啤酒股嘅資金唔需要被攤薄。其他消費股亦上升,而安踏(02020)一再被沽空機構狙擊,但真金不怕洪爐火,股價仍然企穩微升0.3%。

至於阿Man一向推介要逢低吸納嘅醫藥股,今日升得唔錯,板塊內大部分股份均見上升,閒閒地都升3%以上。不過之前講過N次估值高到離晒地嘅金斯瑞(01548)發盈警指中期業務盈轉虧,股價逆市跌4.6%。話咗太高估值嘅股份,始終都要還原基本步,買醫藥股先揀兩隻龍頭幾時都冇錯。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads