|
熱門:

2018年8月10日 即巿股評 港股直擊

【盤房來料】安踏體育已回落至吸引水平

隔晚納指八連升,但道指跟標指開始腳軟,納指再強亦無法阻礙短線已見超買嘅美股停低抖抖。既然強如美股要抖氣,更何況本身係弱底嘅港股跟內地股市,港股連升4日後回吐,內地股日升日跌,今日回吐壓力唔算大。

恒指今早僅高開7點,開市後曾升58點至28666點,但未能企穩在28600水平,加上A股亦偏軟回吐,港股一度下跌144點,見半低位28463點。恒指中午報28474,跌132點;國指半日跌19點,半日報收11000點。周末前夕,成交淡靜,缸邊友無心戀戰,半日成交只有436億元。暫時大市似喺28400水平整固,今日都係一副呆滯格局,但又搵唔倒一個理由港股要急跌,睇嚟又喺三兩百之間上落,再靜待下一個突破。

之前阿Man提過騰訊(00700)反彈至375元至377元有一定阻力,半日高位375.6元,中午跌逾1%,報收368.2元,騰訊現水平可能要稍作整固,不過能否升破阻力再向上,阿Man唔太樂觀,尤其下周公布業績,一旦有大行對騰訊業績睇唔順眼,一沉百踩只會令騰訊更添沽壓。

至於其他重磅股大多腳軟,就連已四連升嘅恒生(00011),今早創新高已見回落,半日倒跌2.6%,其他本地銀行股亦腳軟,似乎就算加息,資金亦未肯放膽投入銀行股。話咗人民幣只係緩和跌勢,暫時喘定,但唔等於貶值不再回復強勢。人仔中間價稍稍下滑,三大航空股即應聲下跌,幸而阿Man早已提醒,切勿亂衝亂撞高追。

內房股頻發盈喜,而作為藍籌候選名單嘅恒大(03333)升完再升,帶動其他內房股反彈持續。不過相對內房股,內地物業管理股更嚟得穩當,要博反彈或低吸,阿Man寧可揀內地物管股,輕資產,高增長,低負債,喺目前嘅情況遠比高負債,重資產嘅內房股嚟得輕鬆。

希望教育(01765)果然喺進入無蟹貨區後扶搖直上,不過屬於慢熱型,炒咗幾日升幅仍未較招股價高兩成,現價較招股價升14.5%,理應未升夠,可繼續向2.3元目標出發,不過今日周末前夕,先將部份利潤鎖定仍未嘗不可。

至於今日不妨睇番體品股,隔晚Addidas喺歐洲股市表現大勇,多得業績增長顯著,主要受惠世界盃效應。而內地體品股經過一輪調整,目前又屆吸引水平,當中龍頭股安踏體育(02020)較早前跌至250日線後見強大支持,股價亦迅速收復40元失地,料反彈至少何重上43.75元,留意10日線39.8元不容再失,現價買入可以此作止蝕目標。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。