噚日朝早恒指一支大陽燭飆咗上去,基於衝力太強嘅關係, 由開市首5分鐘開始到10點5分到,恒指出現回落,有心捉住個市嘅呢個時候絕對係一個落場靚位;期後大市慢慢向上行,喺11點35到再做多次day high,高見31021點,若然真係晨早入咗恒指牛嘅話,一個朝早就已做完咗個Trade,可以等食lunch。
Miss咗都唔緊要,事關喺下晝2點25分嘅時候,恒指升幅再見收窄,呢個時候嘅5分鐘見SlowSTC(14,3)出現超賣,噚日文中介紹嘅恒指牛(59907)可以落場,雖則到臨收市前個市都無咩表示,但係小注揸到今朝嘅話,見到恒指升196點開市,我諗你都將隻恒指牛收割咗啦。
再睇今日個市,恒指暫時呈高開低收格局,今朝開市嘅31094點亦係暫時(截至10點26分)嘅高位,呢個水平亦都升穿咗條50天線(31006點),講得個格局係高開低走,咁就梗係再次失守條50天線啦,雖然係咁,但係依家恒指嘅水平仲係喺保歷加上升通道之餘,仲築起咗條「上升通道」。下方技術指標SlowSTC(14,3)同MACD已經明顯地發出看好嘅訊號,14RSI則處於中軸水平,至於DMI啦喎,ADX同恒指此前嘅升勢雖然有背馳,但+DI剛抽升穿-DI,即係話連DMI都發出看好訊號,只係可能上升嘅力度唔係咁強啫;唔緊要嘅,捉得到大概嘅方向都唔會死得去邊嘅。
依家10點47分,恒指現報30972點,暫時嘅高位仍然係今朝開市嘅31094點。用呢個點數度上去恒指牛熊證街貨圖嘅話,31000至31099點嗰535張期指其實已經被食得七七八八;上望重貨區就係31300至31399點,呢度有1163張期指(好耐都無見過千張啦),只要大市由高位向上行多305點嘅話,就可以上得到呢個重貨區,計埋沿途殺落嘅熊證, total有2216張期指。
用同樣嘅點數(即305點),用恒指暫時做過嘅低位30916點開始下計行,即到30611點,呢個點數度落恒指牛熊證街貨圖嘅話,其實連最貼價嘅30100至30199點都未掂到,而同時呢度只係得449張期指咁大把。
技術分析走勢再加埋個恒指牛熊證街貨圖,恒指牛(59809),收回價30075點,同現價有逾900距離,見恒指5分鐘圖超賣先好入市,小注呀記得!
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected]