我承認我絕對係一個文盲,噚日好彩有讀者email比我話我知我噚日隻稿推介嘅牛證打錯code,等我可以同返《信報》編輯講返改番,真係抱歉,但都感謝你哋特登email過嚟提點。
噚日執定隻恒指牛(57863)(今次個code無錯架啦)出嚟,打算等尾市時段見超賣時入場;但等到收市咁滯都係搵唔到個靚位,你拆開恒指5分鐘圖你就會見到噚日恒指裂口高開之後就一直橫行至全日收市,而敏感度最高的SlowSTC(14,3),尾市都唔見有邊個位出現明顯嘅超賣,成件事其實係收咗檔架。不過,今朝未打稿之前就收到讀者話噚日一早已經買咗恒指牛,但見噚晚美股腳仔軟,搞到今朝恒指先跌24點開市後,之後就向下衝,依家10點15分,最低暫時見過31461點,跌133點,但已經收復失地之餘,恒指so far倒升31612點,升18點。拆開恒指5分鐘圖睇,就當讀者係噚日下晝1點5分或1點25分,恒指SlowSTC(14,3)見超賣時入(57863),之後揸到今朝見恒指低開高走嘅時候收手,呢一來一回其實都有十零格食到;再者依家恒指都仲倒升緊,若然本身係大注嘅話,都怕且已經收咗隊,上網搵緊今日lunch去邊度食好嘢啦!
若然噚日無入到牛證咁點好呢?轉返恒指日線圖睇,今日粒燭仍然企咗係50天線(31294點)樓上,上升形態仍然未變;轉用保歷加通道睇,上星期四(3月8日)恒指其實重返20天線樓上,換言之亦即係重返保歷加上升通道裡面,到依家都仲一頂穿條保歷加通道頂(31990點),而成條保歷加通道形態亦都呈上,即係話恒指其實仲有再上升嘅空間。
開恒指牛熊證街貨圖睇,依家10點28分,恒指做緊31600點,暫時最高做過31709點,即係話31600至31699點嗰213張期指已經全數死亡,最貼價嘅係31700至31799點,呢度有165張期指。至於最貼價就係第三貼價區,即係31900至31999點,呢度有相當於751張期指。用呢粒數嚟度嘅話,即係話假設恒指今日要一下子爆200幾點上行食到呢個重貨區,講緊都只係升穿保歷加通道頂9點咁大把,大市升穿保歷加通道頂大家又唔係未見過,只係穿得兩三日就會被條保歷加通道包返住咁解之嘛。
至於下方牛證最貼價嘅係30800至30899點,呢度有相當於359張期指,如果現價向下行800點嘅話,就可以食到呢度第一批貨啦,比多100點,即下行900點,仲可以食到30700至30799點嗰743張重貨期指添,但成件事你話會唔會遠咗少少?
哈哈,市場上最貼價嗰四隻恒指牛啲街貨多到呢…(57854)仲100%街貨,幾受歡迎,唯有揀遠少少啦,恒指牛(57839),收回價30650點,同現價價有逾900點差距,槓桿約32倍,成交活躍,見恒指5分鐘圖超賣先好入市,小注為上。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。