本欄去年一直唱淡美股，原因是美國縮表加息，最怕嘅情況是銀行壓力爆表，按08海嘯經驗是會突然出現，昨晚大家應該見識過呢個威力。
若果閣下唔炒虛擬貨幣，虛幣銀行Silvergate清盤相信只是小事一樁。不過本欄一直不停強調要留意瑞信事件發展，突然美國證券交易委員會(SEC)質疑瑞信2019年和2020年財務情況，更令瑞信推遲發表年報，要留意瑞信事件會否越變越大。
當然，引爆昨晚美股大冧是美國矽谷銀行(Silicon Valley Bank)母公司SVB Financial Group宣布供股。一間銀行宣布供股絶對唔會令股價大跌六成，引致股價大瀉原因是SVB行政總裁稱，竟然已悉數手上210億美元填氹，更錄得稅後損失達18億美元。
矽谷銀行絶非二打六
或者大家未必矽谷銀行是何許人事，呢間銀行絶對唔喺「二打六」。稱得上矽谷銀行，其主業就當然在矽谷，矽谷內則擁有全球大量高質創新企業，矽谷銀行借錢比呢類有「錢」或「前」途企業，除獲得利息收入外，矽谷銀行甚至會入股或行使認股期權進行股權投資，變相成為天使投資者，在低息狂印環境下，當然喺一盤「有景」生意。
問題是央行持續加息，變相呢批無盈利的初創企業估值大跌，情況如軟銀旗下願景基金，但矽谷銀行是銀行背景，背後有儲戶支持，與此同時，息口上升下，存款利率亦會上升，若果存款利率低過近乎無風險的國債，存戶自自然然寧願買國債揸到到期(例如買兩年期債)，好過放在銀行存款。
若果存戶從銀行獲取利息，但銀行又唔夠錢比客戶，當然就要變賣家產。不過，過往低息環境下，銀行如買入大量國債，在目前利率高企水平下，在二手市場沽售國債，債價當然下跌不少，正正是矽谷銀行昨日大瀉原因。
大鱷叫救矽谷銀行
理論上，矽谷銀行也可以賣科企股股權債，不過正正是呢類股權估值下跌唔少，加上流動性極低，對家一定開天殺價，所以都喺死路一條。
其實矽谷銀行對科網企業有一定重要性，因該行給予貸款支持科技產業研發，美國對沖基金Pershing Square創辦人、著名大鱷阿克曼(Bill Ackman)便呼籲華府要救SVB。
至於隔晚為何SVB股價大冧影響埋摩通、大摩、高盛及富國銀行等股價，因為SVB唔喺二打六，加上矽谷銀行會否會對其他銀行產生Counterparty Credit Risk，呢個大家都唔知，既然大家唔知，梗喺沽左先講。
銀行作為百業之母，一旦出事，股市勢必波動，也是本欄一直唱淡原因，因此別天真相信仿間成日吹加息便會利好銀行股，首先而家喺孳息率曲線倒掛，其次美國樓市數據正急速下滑，經濟差又點會有商家向銀行借錢，銀行股絶對喺買唔過！
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周五在「信報網站」及「港股360」撰文。
