即巿股評 | 2018-03-12 13:16
上周四《盤房來料》標題『大市快突破向上已露端倪』,雖然周五呼籲大家少理指數幅,盡量喺板塊寶覓食,可惜仍有淡有未領悟當中道理,一味買熊養熊過周末,未有理會大亦成功喺10日線同20日線暫穩腳後,定必向上挑戰50日線。結果周五被挾住過埋周末,周五晚美股做好,納指更創收市新高,港股今早一開市,31500以下嘅熊證街貨全數陣亡,除咗向淡友講聲RIP,阿Man已經唔知講乜好。
恒指裂口高開540點,報31536點為半日高位,成功收復50天線(約31257點),但又裂口高開,兼盡殺31500下面嘅熊仔,短線再大幅抽高挾上誘因未搵到,升幅收窄亦好正常。恒指升幅曾收窄至346點,見31342點半日低位。恒指中午收報31469點,升472點;國企指數中午收報12660點,升228點。
咪睇少中銀監下調撥備紅線嘅威力,中銀監此舉,即曲線提醒各內銀放膽撥備,意味住2017年份成績表夠晒水位做嘢,反映內銀股舊年份成績表肯定見得人,呢個背後訊息阿Man收得到,唔知其他缸邊友收唔收到。今日內銀股叫做主力撐住大市上,當中建行(00939)升3%,跑贏其他內銀股,其他內銀升幅亦過1.5%,成個板塊精神爽利。至於內險股亦轉咗勢,當中阿Man至愛平保(02318),仲差些少可升穿87.5元,突破之前橫行區,要突破橫行區,先有本事重上90元樓上。
重磅股四大天王,又係大笨象(00005)最落後,不過呢啲位嘅大笨象,似乎係食之無味,棄之可惜。幾時都係騰訊(00700)跟港交所(00388)行得快啲,呢期阿Man都係睇住騰訊,下周公布業績,派成績表前要搵位低吸。至於吉利(00175)入股平治母公司戴姆勒得到阿爺祝福,從此平步青雲,既然係業界龍頭,更有意成為世界五大汽車製造企業之一,逢回吐要買入股份名單上又點少得佢。銀娛(00027)重上70元,話咗係濠賭股首選,幾乎都無乜機會買低位,一見大陰燭出唔係跳車,反而係搵位撈貨。藥業股繼續強勁,跟教育股輪流落鑊,即炒梗係高沽低買,今日短炒嘅話,係搵醫藥股食糊,而教育股則低吸。
至於大市自30200點企穩後扶搖直上,唔覺唔覺升逾千點,最近兩次上升又遺下上升裂口30700跟今日嘅31000點,大市要再向上挑戰31800回復強勢再闖新高,話唔定要先回補呢兩個上升裂口。雖然大市係向上,但反覆向上嘅機會,大過坐直昇機急上,尤其31800點未收復,仍未有條件再創新高。
麥狄文
(徐狄怡‧證監會持牌人)