美國聯儲局維持利率不變，但鮑爺喺記者會上講明3月減息機會低，其實呢個都係阿Man預咗，甚至上半年都唔減息住，只要美企業績同埋經濟數據唔係太差，太早減息反有機會令通脹死灰復燃，相信聯儲局未必會咁早減息。減息期望落空，美股借勢調整，道指早段曾再創新高，但收市倒跌317點或0.8%；標指跌1.6%，納指更跌2.2%。金龍指數則微跌不足0.1%，港股ADR靠穩升30點，夜期升過百點，港股今早高開。
恒指高開37點，曾倒跌50點，見15434半日低位，不過內地財新中國製造業採購經理指數(PMI)連續3個月擴張，1月財新中國製造業PMI錄得50.8，與上月持平，符合市場預期。內地股市拗腰倒升，帶動港股反彈，恒指曾升319點，見15805半日高位，重上10天線(現處15664)，但於20天線(約15850)前遇阻。恒指中午升209點，報15694；國指升75點，報5269；恒科指升95點，報3101。半日成交額546億元。
重磅科網股反彈，美團(03690)半日升4%，攜程(09961)升3.6%，阿里巴巴(09988)升3.1%，騰訊(00700)升1.7%，京東(09961)升1.6%，小米(01810)升1.1%。恒科指喺呢堆重磅科網股帶動下反彈，暫時3000重要心理關口叫守住，大市要反彈，都要靠呢堆重磅股發力，恒科指再穿前底嘅話，恒指將直指14000大關。
金融股個別發展，友邦保險(01299)升1.4%，港交所(00388)彈1.1%，中國平安(02318)升0.6%，建行(00939)升0.4%，中行(03988)無起跌。大笨象(00005)偏軟，工行(01398)跌0.2%，招行(03968)跌0.9%。
醫藥股終於見到較顯著反彈，藥明生物(02269)升5.6%，藥明康德(02359)升4.6%，翰森製藥(03692)及中國生物製藥(01177)升3.9%，石藥集團(01093)升3.1%，國藥控股(01099)升2.4%。除咗醫藥股，早前持續弱勢嘅內需消費股都有唔錯表現，李寧(02331)及海底撈(06862)升6.9%，為半日表現最好嘅藍籌股；啤酒股百威亞太(01876)升5.7%，潤啤(00291)升4.3%。
春節長假期將近，市場憧憬過年澳門旅遊業興旺，濠賭股有追捧，銀娛(00027)升逾半成，金沙中國(01928)升3.9%，永利澳門(01128)升4.1%，美高梅中國(02282)升半成。
港股雖然高開，但20天線遇阻，未能重上20天線及回補15897至16015嘅上升裂口，若今日10天線得而復失嘅話，後市走勢未能樂觀。尤其中港股市受到內外夾擊，內地科企面對外憂（美國制裁）內患（政策風險），前景暫時難以樂觀。科技指若破底，恒指恐怕亦要下破前底。
麥狄文
(徐狄怡‧證監會持牌人)
