美國感恩節假期臨近，美股隔晚反覆向上，道指喺波音公司及微軟股價攀升帶動下高走，抽升超過200點，收市升203點。標指亦升33點，企穩於4500水平之上；納指喺輝達（Nvidia）股價創歷史新高刺激下，升超過1%，收市升159點。中概股表現亦勇猛，主要因人民幣匯價急升，兌美元離岸價升逾500個點子，重返7.15至7.16水平，反映中概股表現嘅金龍指數急升3.5%。人仔回勇，利好中港股市，恒指今早曾升近300點，可惜未能企穩萬八大關。
恒指高開154點，其後升幅擴大至279點，見18057半日高位，但萬八關未能企穩，又見獲利沽盤湧現，升幅收窄至最低143點，見17921半日低位，但未見進一步向下回補即日上升裂口，目前於17900至18000之間窄幅上落整固。恒指半日收報17955，升177點；國指升64點，報6167；恒科指升37點，收4115。半日成交額587億元，都算係咁，主要都要睇住人仔匯價，暫時喺7.13水平上落，抽升後未見腳軟，仍然高企，利好後市氣氛。
重磅科技股個別發展，之前強勢嘅小米(01810)業績後見光死，半日跌近3%，重返16元水平之下。同樣公布完業績後腳軟嘅攜程(09961)，上季多賺16倍，不過去年基數低係今年條數咁靚嘅原因，半日先升近3%後打回頭，倒跌不足0.1%，抹去上半場所有升幅。不過阿里(09988)、美團(03690)跟京東(09618)半日升逾3%，騰訊(00700)則升不足1%，至勁係百度(09888)，升4%；反而之前強勢嘅網易(09999)要唞唞氣，半日跌0.7%。
金融股普遍靠穩，內銀跟內險股表現尚算唔錯，中國平安(02318)及中國人壽(02628)分別升1.5%及1.4%表現較佳；招行(03968)、工行(01398)跟建行(00939)則升不足1%。大笨象(00005)、友邦保險(01299)跟及港交所(00388)好似約埋咁款，都係升0.3%左右。
小米業績見光死，其實整份業績表現唔差，上季經調整後多賺1.8倍，但手機業務平均售價及收入下滑，除咗拖累自己成為最差表現藍籌之外，亦拖累其他手機設備股逆市走軟，舜宇(02382)半日跌1.7%，通達(00698)急跌近一成，比亞迪電子(00285)跌1.5%，高偉電子(01415)跌1.5%；不過，瑞聲(02018)跟丘鈦(01478)分別升1.5%及3%。
融創(01918)表示已滿足所有債務重組條件，股價半日大升18.9%。新城發展(01030)亦急升12.7%，其他內房股同樣造好，債務問題較嚴重嘅，反而錄得半成以上升幅；至於未有債務問題發生嘅，點都升返3%或以上。經過阿爺多次放水，以及指導銀行要支持內房唔好逼倉，內房股最懷時間應該過咗，跟住落嚟都係buy time，等經濟重拾動力，內房銷售得以回復正常，內房股先捱得過債務危機。
至於本地地產股今日亦見有追捧，債息回落，作為收息工具嘅領展(00823)回升，半日升近4%；至於其他地產股，半日亦錄得1%以上升幅，新地(00016)半日僅升0.2%，已經係表現較差。
港股半日未能企穩萬八關，不過能守喺17800至17900之上，後市仍然有機會再挑戰100天線向上突破，關鍵係人民幣需要維持強勢。
麥狄文
(徐狄怡‧證監會持牌人)
