隔夜美股喺最新通脹數據公布之前個別發展，道指反覆靠穩升54點，標指跟納指分別微跌3點及30點。今晚美國會出CPI，呢個數據較為重要，對未來息口走向有較大啟示。從之前嘅數據去睇，估計未來數月CPI會再度回落，主要係油價向下，並未有因為以巴戰爭爆上，二來係房租房價持續向下。估計今晚CPI回落大約3.3%，當全年CPI邁向3%，美國聯儲局其實無乜藉口再加息。
至於反映中概股表現嘅金龍中國指數連升兩日，港股噚日反彈逾200點後，隔晚於夜期及ADR延續升勢，可惜今早高開低走，反覆偏軟，目前於17400水平好淡爭持。
恒指高開68點，半日最多升139點，見17565半日高位，但未能進一步挑戰50天線(17679)，但5天線(17423)及10天線(17475)得而復失，一度倒跌67點，見17358半日低位，暫時叫守返條20天線(17388)，但都危危乎。中午恒指跌17點，收報17408點；國指跌20點，報5968；恒科指高開低走，倒跌30點，報3951。半日成交額429億元，今日跌市成交多過噚日，跌市成交增加，反映缸邊友見反彈就沽貨走人。加上今晚美國公布CPI，唔想博嘅都係走為上着。
重磅科網股拖低大市，本來噚日反彈，美團(03690)已力不從心，半日再跌2.5%；強如小米(01810)亦要唞氣，回吐2.4%。嚟緊將公布業績嘅網易(09999)跌2.3%，阿里(09888)跌1.6%，京東(09618)跌1.2%，騰訊跌0.9%，百度(09888)亦跌1.2%，只有攜程(09961)半日逆市升1.5%。
金融股今日叫頂得兩吓頭鎚，幫手撐吓大市，否則指數唔會仲守到條20天線，平保(02318)終見反彈，半日逆市升2.1%，國壽(02628)亦升1.1%，友邦(01299)則升1%。大笨象(00005)半日升1.5%，港交所(00388)則靠穩，其他內銀股半日普遍靠穩，升幅不足1%。
雙十一購物節，銷售額雖然睇落唔錯，但退貨比例高，似乎旺丁唔旺財，零售股捱沽，安踏(02020)半日跌4.2%，為表現最差藍籌股；李寧(02331)半日跌1.8%，都唔好得去邊。不過，信義光能(00986)半日升3.9%，成為藍籌股升幅冠軍，都有少少爆冷。
市場關注美國今晚公布的CPI，觀望氣氛濃厚，而明日係習拜會，市場憧憬兩國外貿及外交關係有所改善，以至淡友未敢太放肆，大市仍守20天線。不過睇返呢幾日大市表現，確係令人失望，好友有心無力，大市能夠守住萬七關，已經算係仁至義盡了。
麥狄文
(徐狄怡‧證監會持牌人)
