雖然美國就業市場持續放緩，為聯儲局結束加息提供理據，偏偏鮑爺表示必要時將堅定地推行緊縮措施抗通脹，因為未能確定有否有效控制通脹，偏鷹言論令10年債息急升，重上4.6%水平之上，結束美股超過一個星期嘅反彈升勢。美股高開低走，並跌至全日低位收市，道指跌220點；標指終止七連升，跌35點；納指則跌128點。VIX回升至15.29，呢個數字又唔算太恐慌，暫時未對美股構成威脅。目前美股主要由市場情緒主導，而市場情緒則取決於債息走勢。
美股回軟，本來跌咗三日嘅港股，隔晚夜期跟ADR至17400水平，今日低開後跌幅擴大至超過300點，失守10日線(17447)及20日線(17421)，但盤中高低位波幅只有152點。恒指低開160點，報17350已經係半日高位，其後跌幅擴大至312點，見17198半日低位。半日恒指報收17232，跌278點；國指跌115點，報收5915，失守6000關；恒科指跌118點，半日收3905，4000大關不保。半日成交額縮水至396.18億元，周末前夕加上資金面薄弱，跌到呢啲水平都未見有資金入場低吸。
重磅科技股幾乎全線向下，只有攜程(09961)無起跌，強如小米(01810)跟網易(09999)都分別跌0.6%及0.9%，其他重磅科技股跌幅更大，京東(09618)再度失守紅底，半日跌3.2%；而美團(03690)、百度(09888)半日齊齊跌逾3%；騰訊(00700)半日跌1.4%，阿里(09888)半日跌2.8%，全共拖低恒指逾百點，佔大市超過四成跌幅。
金融股亦全線向下，平保(02318)跟招行(03968)跌逾2%；友邦(01299)跟大笨象(00005)跌少於1%，港交所(00388)半日跌1.2%；其他內銀股普遍跌少於1%。債息急抽，對息口敏感嘅地產股不利，加上港鐵(00066)東涌東站項目，竟然一份標書都收唔到，十年以嚟第一次咁難睇，港鐵半日跌近1%，其他地產股亦全線向下，跌幅由0.5%至2.2%不等。
晶片股今日倒水，中芯(00981)第三季純利按年大跌八成，半日插水6%，為跌幅最大藍籌；華虹半導體(01347)第三季純利按年下跌八成六，中午急跌13.3%；上海復旦(01385)亦跌2.6%；晶片設備商ASMPT(00522)則跌1.9%。業績唔好插水正常，連理想汽車(02015)Q3業績好過預期，股價半日一樣照跌近6%，其他汽車股亦偏軟。
鮑爺放鷹再度震散港股，本來已係弱底嘅港股，再度失守多條移動平均線，走勢上係相當疲弱，不過實際上美國整體經濟開始放緩，而息率長期高企，亦會窒礙美企發展，美國再加息空間有限，只係鮑爺不斷出口術嚟壓抑通脹，講多過做。不過喺港股資金面薄弱嘅情況下，要伋動反彈攻勢難過登天，好友可做嘅，只有節節退縮，能夠守住17000支持位已經叫唔錯，反彈至18000水平掉頭，若然今個月再無太壞消息，估計暫時港股都係萬七萬八，七上八落咁，難以有太大突破。
麥狄文
(徐狄怡‧證監會持牌人)
