隔晚美聯儲局主席鮑爺發表講話，避談貨幣政策及經濟前景，不過10年美債息回落至4.5%，但美元仍然維持強勢，美匯指數於105至106之間徘徊。雖然市場普遍認為息口已見頂，但喺通脹未見大幅回落下，聯儲局班友仔，都係會出口術放吓鷹以抑制通脹。美股隔晚個別發展，道指跌40點，但標指連升八個交易日，係兩年以嚟最長連升日數，隔晚再升4點；納指則升10點，變化不大。不過，隔晚反映中概股表現嘅金龍指數則跌0.46%，加上最新公布的CPI顯示內地再陷通縮，港股連跌兩日回吐近400點後，今日繼續反覆向下。
恒指低開15點，早段曾升48點，見17617半日高位，可惜內地數據公布後，港股升勢不保，迅速回落，最多跌111點，見17457半日低位，考驗10天線(約17463)及20天線(約17471)滙聚區後，成功守住，跌幅收窄。半日恒指報收17513，跌54點；國指跌13點，報6026；恒科指力保不失，微升1點，報4021。半日成交額只有413.85億元，好友自我安慰，連日回吐成交減少，但說穿了就係資金面薄弱，回吐亦唔見資金入場買貨。
重磅科網股個別發展，小米(01810)強勢依然，連升七個交易日，再創年半高位，半日再升近2%。但ATMJB全線向下，京東(09618)跟百度(09888)半日齊齊跌逾1%；騰訊(00700)跟阿里(09988)跌不足1%；美團(03690)不斷玩停掣，升升跌跌，中午跌0.1%。不過擕程(09961)跟網易(09999)逆市升，後者更升超過1%。
金融股靠穩，只有噚日受謠言困擾嘅平保(02318)，急跌後已否認收購碧桂園(02007)，但今日股價仍要再跌1.5%。友邦(01299)跟大笨象(00005)分別升0.7%及0.2%；其他內銀及內險股靠穩或微升，港交所(00388)半日亦靠穩，微升0.1%。
噚日有外電傳言指平保出手打救碧桂園，收購碧桂園嘅傳聞令到平保股價仆直嘅同時，內房及物管股炒上，但平保否認傳聞後，雖然平保今日續跌，但啲內房股同物管股都急急回吐，龍湖(00960)半日跌4.8%，係表現最差藍籌股，不過其他內房同內險股，大把跌得多過佢，至少都跌2%以上，差嘅就跌8%以上。
大市由上月低位反彈至早前大約萬八水平後回吐，目前喺所有移動平均線之上整固，市場普遍預期息口見頂，加息周期告一段落，雖然減息或要待明年中過後，但至少停止再加息，對股市有一定幫助，而美國債息亦由高位回落。不過內地近日公布嘅經濟數據，全部強差人意，未能支持中港股市持續反彈，市場等待下周習拜會後，中美關係進一步改善，以及內地推出更多措施扶助經濟。目前大市支持位大約喺17400至17500水平，短線阻力為17800至18000水平。
麥狄文
(徐狄怡‧證監會持牌人)
