隔晚美股反覆,市場觀望美國今晚公布就業數據,投資者態度審慎,三大指數反覆,道指盤中曾跌逾100點,其後收市跌9點;標指則跌5點;納指跌16點。VIX喺18.5水平徘徊,波幅開始收窄,等埋今晚嘅就業數據或者會有更清楚方向。至於港股噚日喺成交相當奀豬下,微彈18點,今早好友繼續反擊,憧憬下周北水回歸有助力,港股今日挾升逾300點,重返10日線(17531)附近。
恒指高開156點,開市價13370已經係半日低位,其後節節上升,最多升389點,見17603重返10日線之上,目前於10日線附近徘徊。中午恒指報收17526,升312點;國指升107點,報收5995;恒科指半日升71點,報3829。半日成交額280.24億元,睇怕今日成交額都係唔夠500億。
藍籌股全線反彈,金融股撐起大市,四大內銀股全部升2%以上,友邦(01299)亦升2.4%;平保(02318)則升1.7%;大笨象(00005)半日升1.6%;港交所(00388)則升1.4%。重磅科網股今日繼續反彈,美團(03690)跟騰訊(00700)半日升逾2%,阿里(09988)跟京東(09618)半日分別升1.9%及1.5%,小米(01810)及攜程(09961)同樣升逾1%,阿里健康(00241)半日升4.6%,成為最大升幅藍籌股。本地地產股亦繼續彈,恒隆地產(00101)半日升3.6%;恒地(00012)升2.7%;長實(01113)升2.1%;領展(00823)升1.3%;新地(00016)升0.8%;新世界(00017)升0.6%。
融創(01918)獲高等法院批准境外債務重組計劃,半日升4.1%,帶動其他內房股做好,龍光(03380)炒高6.4%;佳兆業(01638)急升13.7%;富力(02777)揚3.3%;合景(01813)彈高2.2%;龍湖(00960)升2.6%;碧桂園(02007)升2.3%;中國海外(00688)漲1.3%;華潤置地(01109)升2.5%;不過恒大(03333)繼續尋底,半日再跌6.3%。
其實港股都無乜嘢好講,雖然今日反彈,但10日線都未必企得穩,都唔好講有冇本事挑戰20日線(17764),基本上唔上返去20日線企穩,港股仍處於弱勢,短線技術性反彈,若然再失守17300嘅話,萬七不保之餘,仲好多機會回補去年11月嘅大裂口,講緊係16100至16800點,即係輸現價仍有至少700點下跌空間。尤其係成交持續萎縮,彈一日跌三日,拾級而下,繼續向下尋底。
麥狄文
(徐狄怡‧證監會持牌人)