美國國會通過臨時撥款法案，避過政府停擺，其實都係意料中事。每次財案通過前，兩黨必定玩嘢以爭取政治本錢，到限期前兩黨定必達成共識，美國政府從未因此停擺，大家已見怪不怪。
再有美國聯儲局委員放鷹，10年債息又創新高，美股個別發展，道指跌74點；標指幾乎持平，納指則升88點。VIX大約喺17水平徘徊，好淡雙方爭持。標指4300水平攻防戰。美國息口即使唔再向上，但高息可能仲維持一段長時間，引發資金回流美元，美匯指數反彈至107，離岸人民幣回落至7.33水平，隔晚ADR及今早黑期恒指已回落至17600水平，港股長周末假期後又再捱沽。
恒指低開263點，開市報17546已經係半日高位，其後跌勢持續，最多跌596點，見17212，創去年11月29日低位，回補當日裂口但未見反彈，半日仍要跌逾500點。半日恒指收報17278，跌531點；國指失守6000大關，跌206點，報5942；恒科指跌113點，收3825。半日成交額554.15億元，跌市嚟講成交略為回升，反映沽壓都唔嘢少。
藍籌股只有友邦(01299)逆市升，半日升0.3%；其他藍籌股幾乎全軍覆沒。大笨象(00005)半日跌2.2%，暫時險守60大關；平保(02318)半日跌5.4%，都係人民幣貶值累事。其他內銀及內險股表現疲弱，普遍跌逾2%。科技股係另一個拖低大市嘅板塊，騰訊(00700)半日跌2.6%，300元大關不保；阿里(09988)、京東(09618)、網易(09999)跟百度(09888)半日齊齊跌逾3%；美團(03690)弱勢未改，半日跌超過半成；攜程(09961)半日亦跌4%；連埋小米(01810)半日跌近3%，呢一堆科技股已拖低恒指超過170點，佔大市逾三成跌幅。
市場擔心全球經濟放緩，石油需求下降，油價近日回軟，布油今日更跌穿90美元，創超過三星期低位。石油股腳軟，三桶油捱沽，當中以中海油(00883)跌2.8%算跌得少，中石化(00386)跟中石油(00857)半日跌逾半成。除咗石油股捱沽，美元強勢拖累金價回落至七個月低位，金礦股同樣受壓，招金(01818)挫4%；山東黃金(01787)挫4.2%；中國黃金(02099)插5.2%；SPDR金ETF(02840)則下滑2.9%；紫金(02899)挫3.7%。
假期前反彈嘅地產股，今日打回原形，新世界(00017)派成績表，末期息勁減八成，股價半日插水6.6%，其實都預咗新世界要減派息，目前嚟講新世界主要任務係去槓桿，派息減少亦合情合理。至於其他本地地產股，跌幅由超過1%至5%不等。香港樓市踏入今年以嚟持續走軟，市場不斷有聲音要求港府撤辣，但暫時未見有動靜，之前放寛咗按揭成數，但唔少買家就算因為首期減咗有機會上車，但息率高企，經濟低迷人工唔加，準買家就算做大啲份按揭，都過唔到壓測申請按揭。要遏止本港樓市持續向下，可能撤去辣招會更直接，至少有機會吸引返班炒家入場。不過一旦炒家重新入場，對用家嚟講又非好事，點做樓市才止跌，但樓價又唔再急升令用家可以上車，港府處於兩難局面。
麥狄文
(徐狄怡‧證監會持牌人)
