隔晚美股下跌，道指結束自9月開局以嚟升勢，主要係甲骨文績後股價急跌逾一成，加上蘋果公司發布會後，股價果然係高開低走，拖累大市氣氛，三大指數下跌。道指跌17點，標指跌25點，納指更跌144點。雖然暫時美股沽壓唔算大，仍然喺高位徘徊，睇嚟今個月議息之前，都唔會有太大變化。夜期跟ADR卻上升，但港股半日先升後回，五日累跌愈800點後，今日又嚟高開低走，半場萬八關不保。
恒指高開105點，一度升174點，見18200半日高位，剛好到20天線(18208)前止步，始終未能收復任何一條移動平均線，喺A股倒跌大幅回落下，港股亦轉升為跌，一度倒跌70點，見17954半日低位。恒指中午收報17988，萬八關未能收復，跌37點；國指跌23點，報6236；恒科指收4038，跌25點，隨時又考驗四千大關。半日成交額418.2億元，咁嘅成交額，睇見唔開胃。雖然人民幣喺阿爺出手干預下，暫時守住7.3關，在7.28至7.29水平，但中港兩地股市仍然疲弱，缺水欠成交係老問題。
藍籌股個別發展，金融股有起有跌，大笨象(00005)半日升1.4%，同友邦(01299)升0.9%撐起個市，不過平保(02318)半日跌0.5%，港交所(00388)都跌0.7%，險守三百大關。其他內銀股有升有跌，不過老實講，阿爺唔想內房死，內銀被逼要讓利，咪再貪高息買內銀股，掉入收息輸價嘅陷阱。至於科技股普遍走軟，阿里(09988)半日跟京東(09618)齊跌0.8%，美團(03690)跌幅更超過1.5%，百度(09888)跟網易(09999)跌1%，一眾科網股係拖低大市主要兇手，可能係隔晚納指跌逾百點拖累氣氛。
內房股又嚟料，傳碧桂園(02007)境內債「H20碧地4」展期方案已過關，至此，其8隻境內債展期已有7隻獲持有人會議通過，僅剩「H16騰越2」仍待通過，碧桂園炒高6.5%。其他內房股有個別炒高逾兩成，其他內房股升幅由1%至一成不等。物管股都係跟到實，但升幅無內房咁大，升最多嘅時代鄰里(09928)都不過升一成，其他物管股升1%至7%左右。
不過醫藥股回吐，國藥控股(01099)跌4.5%，係表現最差藍籌；藥明生物(02269)跌2.2%；翰森製藥(03692)跌1.7%；中國生物製藥(01177)及京東健康(02618)跌1.3%；阿里健康(00241)跌0.6%；石藥集團(01093)無起跌。不過盈健醫療(01419)發盈警，料上年度盈利降，半日大跌22.5%，好彩呢隻股份一向唔係熱炒股，留意嘅人亦少，應該唔係太多人中伏。
暫時港股喺萬八關爭持，但喺多條移動平均線之下上落，加上資金面較弱，喺無新資金流入下，都係易跌難升，幸而人民幣總算有阿爺頂住，可能萬八呢個心理關口，都頂到兩下頭鎚。
麥狄文
(徐狄怡‧證監會持牌人)
