美國小非農新增職位低過預期，美股高開靠穩，道指升37點，標指升17點，納指升75點或0.11%。就業數據顯示美國經濟有所放緩，推動債息回落，不過美企盈利經過去年倒退後，今年再跌幅度有限，目前標普往績市盈率為25倍，回報跟10年債息差不多，若考慮下半年盈利因基數低有望回升，標指喺4200至4300已具一定吸引力，所以美股出現逢低有買盤吸納嘅現象。
恒指高開97點，內地公布8月製造業PMI升至49.7，好過預期，一度帶動港股升184點，見18667半日高位，唔知係咪超強颱風逼近，大家都唔多願買貨，因為一旦明日轉掛八號風球，嬌情嘅港股就要休市，變相要承受一個長周末三日風險，喺買盤無以為繼下，港股掉頭向下。中午恒指收報18434，跌48點；國指倒跌3點，報6353；恒科指升17點，報4212。半日成交額只有502億港元，持續低迷。
因為憧憬港府或隨內地減股票交易印花稅，以及推出措施激活市場成交，港交所(00388)連升幾日後，今日卒之要唞氣，半日倒跌1.4%，目前仍守住300元樓上。重磅科網股則個別發展，騰訊(00700)跟阿里(09988)半日分別升0.3%及0.1%，但美團(03690)沽壓再現，跌2.8%；京東(09618)亦跌1.3%。不過百度(09888)半日升3.2%，主要係內地有8個企業及機構的大模型位列第一批名單，其他AI概念股如商湯(00020)、美圖(01357)及網易(09999)均見上升，支持恒科指半日仍維持升勢。
其他重磅藍籌股同樣個別發展，大笨象(00005)半日跌0.6%，但平保(02318)則升1%，友邦(01299)靠穩，微升0.07%。內銀股有升有跌，工行(01398)半日升1.1%，但建行(00939)卻跌0.2%。內房股升跌不一，龍湖(00960)半日跌5.6%，藍籌之中表現最差；但剛公布業績嘅碧桂園(02007)開市一度升8%，但半日升幅收窄至1.1%。美國通脹及經濟有放緩跡象，美匯指數回軟，紐約現貨金價創三周高位，金礦股逆市上揚。不過鮑爺從來未改口風，今年餘下時間仍有一次加息可能，金價或者都係區間上落。
港股噚日先升後回軟，恒指最高見18742，受制8月中大型下跌裂口底部18792點，收市微跌1點報18482，未能守穩20天線18549，而科指更回吐近1%。指數反覆回升幾日，嚟到20天線及反彈跌幅0.382黃金比率位置遇阻力，目前好淡爭持。唔排除呢期走勢較反覆，或出現日升日跌情況。今日恒指高開，但未幾已失20天線及下穿18500，短期或下試18100至18300尋找支持。
麥狄文
(徐狄怡‧證監會持牌人)
